فوجی عدالتوں کیخلاف درخواستوں کی سماعت کیلئے لارجر بینچ تشکیل دیدیا گیا۔ درخواستوں کی سماعت کل دوپہر پونے 12بجے ہوگی۔ چیف جسٹس عمر عطا بندیال کی سربراہی میں 9 رکنی لارجربینچ تشکیل دیا گیا ہے۔
بینچ میں جسٹس قاضی فائز عیسیٰ ، جسٹس طارق مسعود اور جسٹس منصور شاہ ،جسٹس اعجازالاحسن ، جسٹس منیب اختر، جسٹس یحیٰی آفریدی، جسٹس مظاہر نقوی اور جسٹس عائشہ ملک شامل ہیں۔ اپریل کے بعد یہ پہلی بار ہے جب قاضی فائز عیسیٰ بھی چیف جسٹس کے ساتھ ایک ہی کورٹ روم میں بیٹھ کر سماعت سنیں گے -تفصیل کے مطابق فوجی عدالتوں میں عام شہریوں کے ٹرائل کیخلاف 4 درخواستیں سماعت کیلئے مقرر کی گئی ہیں، سپریم کورٹ کے رجسٹرار آفس کی جانب سے درخواستوں پر کوئی اعتراض بھی عائد نہیں کیا گیا، چیف جسٹس عمر عطاءبندیال نے درخواستوں کو نمبر لگانے کی منظوری دی۔
یہ درخواستیں چوہدری اعتزاز احسن ،سردار لطیف کھوسہ اور سابق چیف جسٹس سپریم کورٹ جواد ایس خواجہ کی جانب سے دائر کی گئی تھیں –