پاکستان کے سابق آل راؤنڈر عبدالرزاق نے 2 روز قبل خبر بریک کی تھی کہ پی سی بی میں مصباح الحق کو اہم عہدہ دیا جارہا ہے -جس کا آج جواب مصباح الحق کی جانب سے آگیا قومی کرکٹ ٹیم کے سابق کپتان مصباح الحق نے کہا کہ پی سی بی نے فی الحال کوئی رابطہ نہیں کیا اگر رابطہ ہوگا تو دیکھوں گا کیا رول دیا جاتا ہے، سری لنکا کے خلاف ٹیسٹ سیریز پاکستانی سپنرز کیلئے چیلنج ہوگی، سیریز میں سپنرز کا رول بڑا اہم ہوگا۔
میڈیا سے گفتگو کرتے ہوئے ان کا کہناتھاکہ امید ہے پاکستان ورلڈ کپ میں اچھی کارکردگی دکھائے گا، بھارت میں کنڈیشن زبردست ہوتی ہے تاہم اندیا کی وکٹیں پاکستان کے لیے بہترین ہیں اور انہیں ان پر کارکردگی دکھانا آسان ہے ، کراؤڈ کا پریشر ہوتا ہے مگر اتنی بھیڑ کے سامنے کھیلنے سے کھلاڑیوں کے اعتماد میں اضافہ بھی ہوتا ہے ۔ ورلڈ کپ میں اہم کام 11 کھلاڑیوں کا انتخاب ہے جو کنڈیشن کو دیکھ کر سوچ سمجھ کر کرنا ہوگا۔
مصباح الحق نے کہا کہ پی سی بی میں بار بار تبدیلیوں سے ملک میں غیر یقینی صورتحال پیدا ہوتی ہے، جس سے کرکٹرز اور منیجمنٹ میں بھی غیر یقینی کی صورتحال پیدا ہوجاتی ہے جو اچھی بات نہیں ہے، جو بھی ادارہ ہو اس میں مستقل مزاجی ہونی چاہیے، پی سی بی میں بار بار تبدیلی سے کھلاڑی مشکلات کا شکار ہیں۔