جون سے بارشوں کا طویل سلسلہ شروع ہونے والا ہے؛محکمہ موسمیات

ویسے تو اس وقت پوری قوم آسمان کی طرف نظریں جمائیں بادلوں اور بارش کی منتظر ہے مگر سورج ان کی یہ تمنا خاک میں ملارہا ہے اور ان کا دل اور جسم دونوں جلارہا ہے مگر محکمہ موسمیات نے بتادیا ہے کہ اگلے ماہ سے بارشوں کا طویل سلسلہ شروع ہونے والا ہے -پاکستان میں رواں سال جون سے اگست تک بیشتر مقامات پر معمول سے زائد مون سون بارشوں کا امکان ہے۔
محکمہ موسمیات کے مطابق ملک کے چاروں سوبوں میں ابر رحمت کھل کر برسے گا ، معمول سے زائد بارشوں کا زیادہ امکان وسطی اور شمالی پنجاب میں ہوگا جبکہ جنوبی سندھ میں بھی معمول سے زائد بارشیں ہوسکتی ہیں جس کے سبب دریاؤں میں سیلابی صورتحال اور شہروں میں اربن فلڈنگ کا خدشہ ہے۔محکمہ موسمیات کے مطابق بلوچستان میں بھی رواں سال معمول سے کچھ زائد بارشیں متوقع ہیں جبکہ زائد درجہ حرارت کے باعث خیبرپختونخوا،کشمیراور گلگت بلتستان میں برف پگھلنے کا عمل تیز ہوگا جس سے سیلاب کا خطرہ بھی بڑھے گا ۔محکمہ موسمیات کے مطابق مون سون کے دوسرے مرحلے کے مقابل پہلے مرحلے میں زائد بارشوں کا امکان ہے جو اگلے ماہ شروع ہونے جارہی ہیں ۔