پاکستان بھر میں بادلوں نے ڈیرے دال لیے ہیں کراچی میں کہیں موسلادھار اور کہیں ہلکی بارش کے سپیل جاری ہیں اس کے علاوہ بادلوں نے پنجاب کا بھی رخ کرلیا ہے اور لاہور کے مختلف علاقوں میں بھی بارش کا سلسلہ جاری ہے –
کراچی میں مغربی سسٹم کے اثرات کے سبب جمعہ کی صبح سے ہی مطلع ابر آلود ہے، صبح ساڑھے دس بجے مختلف علاقوں میں بارش ہوئی جو تھم گئی بعد ازاں کچھ وقفے کے بعد بارش دوبارہ شروع ہوگئی۔بلدیہ ٹاؤن، سرجانی ٹاؤن، اسکیم 33، نیو کراچی، ایف بی ایریا، ناظم آباد، صدر، کراچی ائرپورٹ، شاہراہ فیصل، کورنگی، ملیر، لانڈھی، کلفٹن، گلشن معمار ، گلشن اقبال، گلشن حدید ہ وقفے وقفے سے بارش کا سلسلہ جاری ہے۔
بارش کے سبب مختلف علاقوں موٹر سائیکل سوار وں کے پھسلنے اور کئی مقامات پر سڑکوں پر پانی بھرنے سے ٹریفک جام کی بھی اطلاعات ہیں۔مغربی ہواؤں کا سسٹم اس وقت اپنی پوری شدت کے ساتھ بلوچستان کے ساحلی علاقوں میں بھی موسلادھار بارش برسا رہا ہے جو آہستہ آہستہ یہ سندھ کے ساحلی علاقوں کی جانب بڑھ رہا ہے۔
محکمہ موسمیات کی جانب سے کراچی میں آج دوپہر سے بارش کے چار اسپیل کی پیشگوئی کے بعد شہر میں رین ایمرجنسی نافذ کردی گئی ہے اور تمام بلدیاتی اداروں، انتظامیہ اور اسپتال ملازمین کی چھٹیاں منسوخ کردی گئی ہیں۔وزیراعلیٰ سندھ نے حادثات اور کرنٹ لگنے کے واقعات کے پیش نظر عوام سے غیر ضروری طور پر گھروں سے نہ نکلنے کی اپیل بھی کردی ہے جب کہ کنٹونمنٹ ہیڈکوارٹر میں بھی ایمرجنسی سیل قائم کیا گیا ہے۔
سول ایوی ایشن اتھارٹی نے کراچی میں ممکنہ آندھی اور طوفانی بارشوں کے پیش نظر انتظامات کو حتمی شکل دے دی۔ اس حوالے سے جاری کردہ الرٹ کے تسلسل میں کسی بھی ہنگامی صورتحال کے پیش نظر عملہ 24 گھنٹے متحرک رہے گا ۔ فنل ایریا پر اضافی برڈ شوٹرز تعینات کردیے گئے ہیں۔
شہر میں آج بارش کی پیش گوئی کے پیش نظر حکومت سندھ نے سرکاری، خود مختار و نیم خودمختاروں اداروں میں نصف دن کی تعطیل کا اعلان کیا ہے۔ اس سلسلے میں جاری نوٹیفکیشن کے مطابق یکم مارچ کو مذکورہ بالا نوعیت کے تمام دفاتر کے اوقات کار دوپہر 2 بجے تک ہوں گے جبکہ نوٹیفکیشن کا اطلاق نجی شعبے کے اداروں پر بھی ہوگا۔
