وزیر داخلہ رانا ثناء اللہ نے پنجاب میں پرامن طریقے سے ضمنی انتخابات کے انعقاد کے لیے جامع اور مثالی انتظامات کرنے پر الیکشن کمیشن آف پاکستان کی تعریف کی ہے۔
اسلام آباد میں ایک نیوز کانفرنس سے خطاب کرتے ہوئے انہوں نے کہا کہ الیکشن کمیشن نے پولنگ کے پورے عمل میں قانون کی حکمرانی کو یقینی بنایا جو کہ قابل تعریف ہے۔
وزیر داخلہ نے کہا کہ کل 3140 پولنگ سٹیشنز میں سے صرف 14 پولنگ سٹیشنوں سے معمولی نوعیت کی شکایات موصول ہوئیں۔
رانا ثناء اللہ نے کہا کہ امیدواروں یا ان کے حامیوں کی جانب سے الیکشن کمیشن کے عملے، الیکشن کمیشن کے قواعد و ضوابط کی خلاف ورزی کی ایک بھی شکایت موصول نہیں ہوئی۔
صوبائی وزیر نے ضمنی انتخابات کے دوران امن و امان برقرار رکھنے پر پنجاب پولیس، رینجرز اور پاک فوج کے دستوں کو بھی سراہا۔
انہوں نے کہا کہ مظفر گڑھ میں تشدد کے واقعے میں نجی کمپنی ملوث تھی جس کے خلاف کارروائی کی گئی ہے۔
