یمنی حوثیوں �نے ان تمام ممالک کو وارننگ دے دی جو اسرائیل سے تعلقات رکھنا چاہتے ہیں اسرائیل کے فلسطین کے ساتھ انتہایہ ظالمانہ حملوں کے بعد عالم اسلام اسرائیل کی پالیسیوں سے سخت رنجیدہ ہے ؛یمنی حوثیوں کا کہنا ہے کہ اسرائیل کی طرف جانے والا جو بھی جہاز ہماری رسائی میں آجائے گا اسے نشانہ بنائیں گے۔ حوثی فوج کے ترجمان یحییٰ ساری کا کہنا ہے کہ بحر روم سے گزرنے والا ہر وہ جہاز جو اسرائیل کی طرف جائیگا، اگر وہ ہماری رسائی میں ہوا تو ہم اسے نشانہ بنائیں گے۔حوثی ترجمان یحییٰ ساری نے کہا کہ یہ فیصلہ اسرائیل کے رفح پر حملہ کرنے کی وجہ سے کیا گیا۔ یاد رہے یمن کے حوثی غزہ پر اسرائیلی حملہ ہونے کے بعد پہلے بھی اپنی حدود سے گزرنے والے بحری جہازوں پر حملے کرتے رہے ہیں اور بہت سے جہازوں کو عملے سمیت قبضے میں بھی لیا گیا۔ اسی سال مارچ میں یمن کے حوثیوں نے خلیج عدن میں کمرشل جہاز پر میزائل حملہ کیا تھا جس کے نتیجے میں 2 سویلین میرین ہلاک اور 6 زخمی ہوگئے تھے جبکہ سال 2024 کے پہلے ماہ میں بھی حوثیوں نے بحیرہ احمر میں امریکی بحری جہاز کو بیلسٹک میزائل سے نشانہ بنایا تھا جس کی امریکی فوج تصدیق کی تھی۔یمن کے حوثیوں نے چند ماہ قبل بھی یمنی صوبے صعدہ کی فضائی حدود میں امریکی ڈرون طیارے کو مار گرانے کا دعویٰ بھی کیاتھا جس کی تصدیق یا تردید امریکہ کی جانب سے نہیں کی گئی تھی ۔
یمن کے حوثیوں نے غزہ میں اسرائیلی کارروائیوں کے رد عمل کے طور پر صہیونی فورسز کے خلاف کھلم کھلا اعلان جنگ کر رکھا ہے اور جب بھی انہیں موقع ملتا ہے وہ اسرائیل کو ٹارگٹ کرتے ہیں ، حوثی اب تک اسرائیل پر 6 بلیسٹک میزائل داغ چکے ہیں۔حوثی اپنے حملوں کو ہمیشہ فلسطینیوں کے ساتھ اظہار یکجہتی کا نام دیتے ہیں اور ان کا کہنا ہے کہ اگر اسرائیل غزہ پر حملے روک دے اور اپنے جارحانہ عزائم سے باز آجائے تو ہماری جانب سے بھی امریکا اور برطانیہ یا اسرائیل کے جہازوں کو نشانہ نہیں بنایا جائے گا۔