انٹر سروسز پبلک ریلیشنز (آئی ایس پی آر) کے ایک بیان میں کہا گیا ہے کہ چیف آف آرمی اسٹاف (سی او اے ایس) جنرل سید عاصم منیر نے جمعرات کو بندرگاہی شہر گوادر کا دورہ کیا جہاں انہیں موجودہ سیکیورٹی صورتحال پر بریفنگ دی گئی۔ فوج کے میڈیا ونگ کے مطابق آرمی چیف کو موجودہ سیکیورٹی صورتحال، فارمیشن کی آپریشنل تیاریوں، چین پاکستان اقتصادی راہداری (سی پیک) کی سیکیورٹی اور پرامن اور محفوظ ماحول کو یقینی بنانے کی کوششوں کے بارے میں بریفنگ دی گئی۔ آرمی چیف نے تمام رینکس کی کاوشوں کو سراہا اور بلوچستان کے عوام کی بھلائی کے لیے پیشہ وارانہ عزم کے ساتھ کام جاری رکھنے پر زور دیا۔ سی او اے عاصم منیر نے مقامی معززین، منتخب نمائندوں اور زندگی کے مختلف شعبوں سے تعلق رکھنے والے لوگوں سے بھی بات چیت کی۔