پیپلز پارٹی کی سیکرٹری اطلاعات شازیہ مری نے کہا ہے کہ وزیراعظم عمران خان اپنے وفاقی وزیر غلام سرور خان کے ذریعے دھمکی دے رہے ہیں کہ وہ اپوزیشن کو خودکش حملے میں اڑا دیں گے۔اتوار کو جاری ہونے والے ایک بیان میں شازیہ عطا مری نے کہا کہ عمران خان اور ان کے وفاقی وزراء اپوزیشن کو دھمکیاں دینا بند کریں، کیونکہ ہم نے عمران خان کی بم کی دھمکی کا سنجیدگی سے نوٹس لیا ہے اور دیگر ریاستی اداروں سے توقع ہے کہ وہ ان دھمکیوں کو صرف ایک دھمکی نہیں سمجھیں گے بلکہ اسکا سخت نوٹس لیں گے اور ان سے باز پرس بھی کریں گے ۔
ان کا مزید کہنا تھا کہ وزیراعظم نے آصف علی زرداری کو بھی اسی طرز کی دھمکی دی ہے کہ وہ ان کے بندوق کے نشانے پر ہیں ، اب ان کے اس بیان کے بعد ان کے وفاقی وزراء خودکش حملے کی دھمکیاں دے رہے ہیں۔ انہوں نے کہا کہ قانون نافذ کرنے والے اداروں کو بھی وفاقی وزیر کی طرف سے دہشت گردی کے اس طرح کے کھلے خطرے کا سنجیدگی سے نوٹس لینا چاہیے اور غلام سرور خان کو گرفتار کرنا چاہیے۔
مری نے کہا کہ کسی کو بم سے اڑانے کی بات کرنا کوئی مذاق نہیں ہے کیونکہ ہم پہلے ہی دہشت گردی سے بری طرح متاثر ہو چکے ہیں اور بڑی قربانیاں دی ہیں۔ پی پی پی رہنما نے کہا کہ نہ صرف وزیر اعظم عمران خان بلکہ ان کی کابینہ کے ارکان بھی نہ صرف ڈٹے ہوئے ہیں بلکہ ملک کے لیے بڑا خطرہ بن چکے ہیں۔ تحریک عدم اعتماد کی کامیابی کے بعد عمران خان اور اس کا مافیا اپنے دماغ کھو چکے ہیں اور خوفزدہ دکھائی دے رہے ہیں۔