عوامی مسلم لیگ کے سربراہ شیخ رشید نے کہا ہے کہ پیٹرول اور ایل پی جی مہنگی کر دی گئی، حکومت نے عوام کا کچومر نکال دیا ہے ، مگر اس کا ری ایکشن تو آئے گا پھر عوام ان کا کچومر نکال دے گی، آخری 7 دن کا کھل ہے اس ہفتے آر پار ہو جائے گا۔
سماجی رابطے کی ویب سائٹ ٹویٹر پر شیخ رشید نے لکھا کہ مہنگائی اور بیروزگاری پر کوئی اجلاس نہیں ہو رہا، وزیرخزانہ لاپتہ ہیں۔ وزیر داخلہ اور وزیر قانون عدلیہ کو دھمکیاں دے رہے ہیں۔ وزرا کے بیانات آرٹیکل 6 کو دعوت دےرہے ہیں۔ عالمی سطح پر پیٹرول سستا ہوا اس کے باوجود پاکستان میں پیٹرول مہنگا کر دیا گیا۔
انہوں نے کہا کہ سپریم کورٹ الیکشن کمیشن کو پیسے ٹرانسفر کرا کے رہے گا۔ جو سپریم کورٹ کا فیصلہ نہیں مانے گا وہ اپنے انجام کو پہنچے گا۔ 90 دن گزر گئے ہیں، نگران حکومتیں ختم ہو گئی ہیں۔ سپریم کورٹ سارے ملک کو بحران سے نکالے گی، وہ پارلیمنٹ جس میں ممبر ہی نہیں آتے اور وہ 85 رکنی غیرقانونی کابینہ عدالت کا خاک مقابلہ کرےگی۔