کمشنر راولپنڈی کا انتخابات میں دھاندلی کروانے کا اعتراف

جب سے 8 فروری کے الیکشن نتائج آئے تھے تو پی ٹی آئی کے امیدوار الزام لگارہے تھے کہ وہ الیکشن جیت چکے تھے رات کو ان کے نتائج بدل کر انہیں ہروایا گیا -آج اس پر کمشنر راولپنڈی نے اس بات کا اعتراف کرلیا کہ ان کے حکم پر راولپنڈی کے نتائج بدلے گئے جس پر وہ بہت شرمندہ ہیں اور اپنے عہدے سے استعفیٰ دے رہے ہیں –
کمشنر راولپنڈی نے بیان جاری کرتے ہوئے کہا کہ میں راولپنڈی ڈویژن میں انتخابی دھاندلی کی ذمہ داری قبول کرتاہوں ، میں انتخابی دھاندلی پر اپنےآپ کو پولیس کے حوالے کر تاہوں، میں نے راولپنڈی ڈویژن میں ناانصافی کی ہے ، ہم نے ہارے ہوئے امیدواروں کو 50 ، 50 ہزار کی لیڈمیں تبدیل کر دیا۔ کمشنر راولپنڈی کا کہناتھا کہ جتنے بھی انتظامی ادارے ہیں جس میں پولیس اور الیکشن کمیشن کا عملہ ہے وہ بھی اس دھاندلی میں ملوث ہیں ، ہم نے انتخابی نتائج تبدیل کیئے ، قومی اسمبلی اور صوبائی اسمبلی کے 14 حلقوں میں دھاندلی کی گئی، میں پوری طرح ملوث ہوں اور اپنے عہدے سے استعفیٰ دے رہاہوں ۔اس کے بعد انہیں گرفتار کرنے کی خبریں بھی میڈیا پر آرہی ہیں مگر لگتا یہی ہے کہ اب سپریم کورٹ اس کیس کا فیصلہ کرے گی –