کراچی کے معروف صوفی بزرگ حضرت عبداللہ شاہ غازی کے 3 روزہ عرس کا آغاز ہوگیا -جشن کے آغاز پر سندھ کے وزیراعلیٰ مراد علی شاہ نے حاضری دی اور چادر چڑھائی -عبداللہ شاہ غازی کے عرس کی تقریبات اسلامی مہینے ذالحجہ میں پورے مزہبی جوش،عقیدے اور ولولے کے ساتھ منائی جاتی ہیں –
بلدیہ عظمیٰ کراچی نے حضرت عبداللہ شاہ غازیؒ کے عرس کے موقع پر 11 جولائی(کل) کو تعطیل کا نوٹیفکیشن جاری کردیا ہےجس کے تحت کل بلدیہ عظمیٰ کراچی کے تمام محکموں میں تعطیل ہوگی۔دوسری جانب پاکستان اور دنیا بھر سے ان کے عقیدت مند کراچی میں واقع حضرت عبداللہ شاہ غازی کے مزار پر پہنچنا شروع ہوگئے ہیں۔ حضرت عبد للہ شاہ غازی کی سب سے بڑی کرامت سمندر کے قریب مزار کے نیچے میٹھے پانی کا چشمہ ہے جو آپ کی چلہ گاہ میں بھی موجود ہے۔ لوگ دور دور سے آتے ہیں اور یہ پانی پی کر شفا یاب ہوتے ہیں۔ آپ کے مزار پر آنے والے زائرین میں ہر عقیدے کے افراد شامل ہوتے ہیں – زائرین کا کہنا ہے کہ انہیں یہاں آکر دل کو تقویت ملتی ہے اور مرادیں پوری ہوتی ہیں۔
سی ایم سندھ مراد علی شاہ نے حضرت عبداللہ شاہ غازی کے مزار پر چادر چڑھا کر 1293 ویں عرس کا افتتاح کیا، فاتحہ پڑھی اور ملک اور صوبہ کی ترقی و خوشحالی کے لئے خصوصی دعا کی،حضرت عبداللہ شاہ غازی کے تین روزہ عرس کی تقریبات 11 جولائی تک جاری رہیں گی@MuradAliShahPPP pic.twitter.com/Qub9GOnRgP
— Mushtaque Ali Rahimoon (@MushtaqueThari) July 11, 2023
حضرت عبداللہ شاہ غازیؒ کے عرس کی 3 روزہ تقریبات کا آغاز کل سے ہوگا۔میئر کراچی بیرسٹر مرتضیٰ وہاب عرس کے موقع پر کراچی کے شہریوں کی جانب سے مزار پر حاضری دیں گے اور فاتحہ خوانی کریں گے۔جبکہ سٹی وارڈن، فائر بریگیڈ، میڈیکل اور میونسپل سروسز کا عملہ عرس کے تینوں دن مزار پر فرائض انجام دے گا۔ اس مزار پر 2 مرتبہ دہشت گردی کے حملے ہوچکے ہیں اس لیے اس سال پولیس کو فول پروف سیکیوریٹی کے احکامات دیے گئے ہیں –
