پاکستان میں اگلے سال فروری مارچ میں چیمپینز ٹرافی ٹورمامنٹ ہوگا ، جس کے لیے گراؤند کو بہتر کرنے کا فیصلہ کرلیا گیا ہے -چیمپیئنز ٹرافی 2025 کیلئے قذافی سٹیڈیم میں اپ گریڈیشن کے حوالے سے کام شروع کر دیا گیا اپ گریڈیشن کے لئے غیر ملکی کنسلٹنٹ اور ڈیزائنرز کی خدمات لی گئی ہیں۔ ابتدائی طور پر مین بلڈنگ سے دفاتر کی منتقلی کا کام شروع کیا گیا ہے جس کیلئے تمام ڈائریکٹرز اور ان کے شعبوں کو فار اینڈ بلڈنگ اور نیشنل کرکٹ اکیڈمی منتقل کیا جا رہا ہے۔ دفاتر کی منتقلی کا کام مکمل ہو جانےکے بعد مین بلڈنگ کو گرانے کا منصوبہ ہے، نئی عمارت کو جدید طرز پر گراؤنڈ کے قریب بنانے کا پلان تیار کیا گیا ہے۔ذرائع کے مطابق مین بلڈنگ میں زیادہ تر ہوسپیٹلیٹی باکسز فرنٹ پر بنانے کا منصوبہ ہے جبکہ قذافی سٹیڈیم کے عمران خان اور فضل محمود انکلوژر میں سیٹوں کی گنجائش بڑھائی جائے گی، منصوبے کے مطابق شائقین کو بہتر ویو دینے کے لئے نئی سکرینیں بھی نصب کی جائیں گی۔ وزیر داخلہ اور چیئرمین پی سی بی محسن نقوی پنڈی کرکٹ سٹیڈیم، کراچی کے نیشنل کرکٹ ارینا اور قذافی سٹیڈیم کی اپ گریڈیشن کا اعلان کر چکے ہیں جس کے تحت تینوں سٹیڈیمز میں شائقین کے بیٹھنے کی گنجائش بڑھائی جائے گی۔اپ گریڈیشن کا کام چیمپیئنز ٹرافی 2025 کی وجہ سے کیا جا رہا ہے، چیمپیئنز ٹرافی آئندہ برس فروری مارچ میں 3 وینیوز پر شیڈولڈ ہے لیکن 6 ماہ کے دوران اپ گریڈیشن کا کام مکمل کرنا پی سی بی کے لئے بڑا چیلنج ہو گا۔اپ گریڈیشن کے لئے غیر ملکی کنسلٹنٹ اور ڈیزائنرز کی خدمات لی گئی ہیں جبکہ اپ گریڈیشن کے دوران انٹرنیشنل میچز کے لئے پلان بھی تیار کیا جا رہا ہے۔