چائنیز گاڑی پر حملہ کیسے ہوا؟ پولیس کا موقف آگیا

پوری قوم جاننا چاہتی تھی کہ آکر اتنی سخت سیکیوریٹی کے باوجود حملہ آور نے چائنیز کی گاڑی کو کس طرح اڑا دیا تو اب اس پر پولیس کے اعلیٰ افسر نے میڈیا ٹاک کی ہے -ڈی آئی جی ایسٹ اظفر مہیسر نے لانڈھی میں غیر ملکیوں کی گاڑی پر خودکش حملہ کرنے والے دہشتگردوں سے متعلق معلومات فراہم کی ہیں -ڈی آئی جی ایسٹ اظفر مہیسر نے بتایا کہ لانڈھی کی مانسہرہ کالونی میں حملہ کرنے والے دہشتگرد پیدل چل کر گاڑی کے قریب آئے، حملہ آوروں کے پاس 6 دستی بم، ایس ایم جی اور 3 میگزین تھے، حملہ آوروں کے پاس پیٹرول کی 2 بوتلیں بھی تھیں، تمام چیزیں حملہ آوروں کے پاس موجود بیگ میں تھیں۔

انہوں نے بتایا کہ ملازمین کی جس وین کو نشانہ بنایا گیا اس کے پیچھے کمپنی کے افسر کی گاڑی تھی، افسر کی گاڑی کے پیچھے کمپنی کے سکیورٹی گارڈز کی گاڑی تھی، دہشتگردوں نے وین پر فائرنگ کی، وین کے پیچھے موجود سکیورٹی گارڈز نے جوابی فائرنگ کی، سکیورٹی گارڈز کی فائرنگ سے ایک دہشتگرد مارا گیا، دوسرے دہشتگرد نے وین کے قریب آکر خود کو دھماکے سے اڑایا، غیر ملکیوں کے ہمراہ موجود سکیورٹی گارڈز نے دہشتگرد سے مقابلہ کیا، دہشتگردکو سر پر گولی مارکر ہلاک کیاگیا۔

انہوں نے بتایا کہ حملہ صبح 6 بج کر 50 منٹ پر کیاگیا، جائے وقوعہ سے خودکش حملہ آورکا سر اور کچھ اعضا ملے ہیں، ہلاک دوسرے دہشتگردکے فنگرپرنٹس کے ذریعے شناخت کی کوشش کی جارہی ہے ، ان کا کہنا تھا کہ غیر ملکیوں سے متعلق تھریٹس موجود تھے، سکیورٹی تھریٹس کےباعث پولیس بھی الرٹ تھی، سکیورٹی سے متعلق سی پیک اورنان سی پیک کا پلان تیارکیا گیا تھا، دھماکا ہوا تو پولیس کی وین قریب موجود تھی جو فوری طور پر موقع پر پہنچ گئی۔
دوسری جانب انچارج سی ٹی ڈی راجہ عمر خطاب نے میڈیا سے گفتگو کرتے ہوئے بتایا کہ تین گاڑیوں میں غیر ملکی جا رہے تھے، خود کش حملہ آور جائے وقوعہ کے قریب موجود تھے، سکیورٹی گارڈ نے حملہ آورں پر فائرنگ کرکے حملہ ناکام بنایا، سپیڈ بریکر پر گاڑی آہستہ ہوئی تو حملہ کیا گیا، گاڑیوں میں موجود تمام غیر ملکی محفوظ رہے۔انچارج سی ٹی ڈی نے بتایا کہ دہشتگرد موٹرسائیکل پرگاڑی کا پیچھا کرتے ہوئے پہنچے، جائے وقوعہ کے قریب دہشتگرد موٹر سائیکل سے اترگئے، دہشتگرد گاڑی کے قریب پیدل پہنچے اور فائرنگ کی۔ہماری دعا ہے کہ یہ پاکستان میں کسی بھی غیر ملکی یا پاکستانی پر ہونے والا آخری حملہ ہو کیونکہ معیشت کی بہتری کے لیے ملک میں امن و امان کا ہونا پہلی شرط ہوتی ہے –