پی ٹی آئی نے عید کے بعد ملک گیر تحریک شروع کرنے کا اعلان کرتے ہوئے کہا ہے کہ گرینڈ الائن کو حتمی شکل دے دی ہے، فارم 45 اور فارم 47والوں میں فرق کرنا ہوگا ،عوام کے مسترد شدہ لوگوں کو مسند پر بٹھا دیا گیا ہے، ملک میں سرمایہ کاری نہیں ہورہی، لوگ باہر جارہے ہیں،بشری بی بی عمران خان کی کمزوری نہیں طاقت ہیں، کھانے میں زہر ملایا گیا چیک اپ ہونے جارہا ہے۔تفصیلات کے مطابق اڈیالہ جیل کے باہراسد قیصر، شبلی فراز ودیگر پارٹی رہنماؤں کے ہمراہ میڈیا سے گفتگو کرتے ہوئے رہنماء پی ٹی آئی عمر ایوب نے کہا کہ قیدی نمبر 804 سے تفصیلی ملاقات ہوئی ہے، بانی پی ٹی آئی کا پیغام ہے ہمارے چرائے ہوئے مینڈیٹ کیلئے جدوجہد جاری رکھنی ہے۔انہوں نے کہا کہ ججز کو دھمکی آمیز خطوط پر بانی پی ٹی آئی نے تشویش کا اظہار کیا ہے، بانی پی ٹی آئی نے کہا وہ عدلیہ کی آزادی کے ساتھ کھڑے ہیں، امید رکھتے ہیں سپریم کورٹ فل بینچ بنا کر ججز کے خط کی تحقیقات کرے گی۔انہوں نے کہا کہ عید کے بعد ہم اپنی تحریک شروع کررہے ہیں، ہم نے گرینڈ الائنس کو حتمی شکل دے دی ہے۔انہوں نے کہا کہ بشری بی بی عمران خان کی کمزوری نہیں طاقت ہیں، ان کے کھانے میں زہر ملایا گیا تھا ،ان کا چیک اپ ہونے جارہا ہے۔ اس موقع پر اسد قیصر نے کہا کہ عید کے بعد بھرپور طریقے سے تحریک چلائیں گے، 12تاریخ کو اختر مینگل کے گھر پر میٹنگ ہوگی، پورے ملک میں جلسے کا شیڈول دیا جائے گا۔انہوں نے کہا کہ پشین میں پہلا جلسہ ہوگا، خیبرپختونخوا میں ہمارے پسند کے آفیسر دے رے ہیں نہ پیسے فراہم کئے جارہے ہیں۔ اسد قیصر نے کہا کہ عید کے بعد پھرتحریک شروع کرنے جارہے ہیں، اگلی میٹنگ کوئٹہ میں ہوگی جہاں سے جلسوں کا شیڈول دیں گے، پاکستان میں آئین اور قانون کی بالادستی چاہتے ہیں، پاکستان کو بنانا ریپبلک بنادیا گیا ہے۔اسد قیصر نے کہا کہ چیف جسٹس کا کردار موجودہ صورتحال میں اہم ہے، سینیٹ میں ہمارے صوبے کے الیکشن کو ملتوی کیا گیا، کے پی نے ایک جماعت کو بھاری مینڈیٹ دیا ہے، کیا یہ اس کی سزادی جارہی ہے۔شبلی فراز نے گفتگو کرتے ہوئے کہا کہ عوام نے تحریک انصاف کو بھرپور مینڈیٹ دیا جو چرا لیا گیا، ہم نے عدالتوں میں جدوجہد کرنی ہے، فارم 45 اور فارم 47والے لوگوں میں فرق کرنا ہوگا۔انہوں نے کہا کہ عوام کے مسترد شدہ لوگوں کو مسند پر بٹھا دیا گیا ہے، ملک میں سرمایہ کاری نہیں ہورہی، لوگ باہر جارہے ہیں۔