پیپلز پارٹی کے ساتھ پنجاب میں سیٹ ایڈجسٹمنٹ نہیں کرسکتے : مریم نواز

آج پیپلز پارٹی اور مسلم لیگ نون میں اختلافات کی خلیج گہری ہوگئی- مسلم لیگ(ن) کی چیف آرگنائزر مریم نواز نے ایک بڑا فیصلہ لیتے ہوئے پنجاب میں پیپلز پارٹی کا سیٹ ایڈجسٹمنٹ کا مطالبہ مسترد کردیا، پیپلز پارٹی نے قومی اسمبلی کی 15 اور صوبائی اسمبلی کی 25 نشستیں مانگی تھیں اور مطالبہ کرد یا تھا کہ ان نشستوں پر( ن) لیگ ہمارے امیدواروں کی حمایت کرے اوراپنے امیدوار کھڑے نہ کرے۔وزیراعظم شہباز شریف اور آصف زرداری نے نوازشریف سے بھی اس معاملے پر رابط کیا تھا تاہم مریم نواز اپنے فیصلے پر ڈٹ گئیں -نون لیگ کو پتہ پے کہ ان کا سب سے زیادہ ووٹ بینک پنجاب میں ہے اگر وہ ہی کم ہوگیا تو پارٹی برباد ہوجائے گی اور پیپلز پارٹی کی پکڑ بھی پنجاب میں ہوجائے گی جو ان کے لیے سیاسی موت ہوگا –

 

سب سے حیرانی کی بات یہ ہے کہ وزیراعظم شہباز شریف پیپلز پارٹی سے سیٹ ایڈجسٹمنٹ پر بات چیت کیلئے تیار تھے اور دونوں رہنماؤں نے نوازشریف سے بھی بات کی تھی تاہم مریم نواز نے پیپلز پارٹی سے انتخابی اتحاد اور سیٹ ایڈجسٹمنٹ کی مخالفت کر دی۔مریم نواز کا مؤقف ہے کہ ہمارے اپنے امیدوار ایک ایک حلقے میں ایک سے زیادہ ہیں، پی پی کو کیسے ایڈجسٹ کریں،تحریک انصاف چھوڑ کر (ن )لیگ کی حمایت کرنے والے منحرف ارکان کو بھی ایڈجسٹ کرنا ہے۔

 

 

مریم نوازنے کہا کہ کیا پیپلز پارٹی کراچی یا سندھ میں( ن) لیگ سے سیٹ ایڈجسٹمنٹ کرے گی؟اور ایسا ممکن ہے تو اس بارے ایک لائحہ عمل تیار کیا جا سکتا ہے،پنجاب کی سیاست ہی مرکز پر اثر انداز ہوتی ہیں ہم اپنی جیتی نشستیں کیسے پیپلز پارٹی کے حوالے کر دیں۔ذرائع نے بتایا کہ مسلم لیگ (ن) کے سینئر رہنما ؤں کی اکثریت نے مریم نواز کے مؤقف کی حمایت کر دی ہے۔تاہم اس بات پر پیپلز پارٹی اس وقت حامی بھی بھر سکتی ہے کیونکہ ابھی سندھ میں انتخابات ہو ہی نہیں رہے –
اس فیصلے پر مفاہمت کا بادشاہ بھی ناراض ہوگیا -مریم نواز کے اس فیصلے پر آصف زرداری خود متحرک ہوگئے اوریوسف رضا گیلانی،احمد محمود و دیگر رہنماؤں کو (ن )لیگ اور تحریک انصاف کے سینئر رہنما پی پی پی میں شامل کرنے کا ٹاسک دیدیا ہے۔مگر پیپلز پارٹی میں جانا پنجاب کے کسی بھی سیاست دان
کے لیے مشکل ترین کام ہوگا –