اسلام آباد: پاکستان الیکٹرانک میڈیا ریگولیٹری اتھارٹی (پیمرا) نے پیر کو سابق وزیراعظم عمران خان کی وفاقی دارالحکومت میں عدالت میں پیشی سے قبل اسلام آباد میں ریلیوں اور عوامی اجتماعات کی لائیو اور ریکارڈ شدہ کوریج پر پابندی عائد کردی۔
تفصیلات کے مطابق پیمرا نے نوٹیفکیشن جاری کیا ہے جس میں کہا گیا ہے کہ اسلام آباد کے علاقے میں عوامی جلسوں اور ریلیوں کی کوریج کے لیے پابندی میں 27 مارچ تک توسیع کی گئی ہے۔
نوٹیفکیشن میں کہا گیا کہ ہدایات کی خلاف ورزی پر سیٹلائٹ ٹی وی چینلز کا لائسنس منسوخ کر دیا جائے گا۔
پاکستان الیکٹرانک میڈیا ریگولیٹری اتھارٹی نے مزید کہا کہ پرتشدد ہجوم کی براہ راست نشریات اور قانون نافذ کرنے والے اداروں پر حملے، افراتفری اور خوف و ہراس پھیلاتے ہیں۔
پاکستان تحریک انصاف (پی ٹی آئی) کے چیئرمین اور سابق وزیراعظم عمران خان جوڈیشل کمپلیکس میں توڑ پھوڑ سے متعلق پانچ مقدمات میں عبوری ضمانت کے لیے آج اسلام آباد کی عدالت میں پیش ہونے کے لیے اسلام آباد روانہ ہوئے۔
یہ فیصلہ خود عمران خان کی زیر صدارت اجلاس میں کیا گیا جس میں انہوں نے پارٹی قیادت اور قانونی ٹیم سے اس معاملے پر تبادلہ خیال کیا۔
22
