پولیس اہل کار کو زخمی کرکے فرار ہونے والی خاتون کی ضمانت مسترد

عدالت نے موٹر وے پولیس اہل کار کو ٹکر مارنے والی خاتون کی درخواست ضمانت خارج کردی ہے۔یکم جنوری 2024 کو معروف صحافی عامر متین کی سابق اہلیہ موٹر وے پر سفر کے دوران روکے جانے پر غصے میں ایک پولیس اہل کار کو اپنی گاڑی سے ٹکر مار کر فرار ہوگئی تھیں جنہیں بعد میں گرفتار کرلیا گیا تھا -تفصیلات کے مطابق سول جج ڈاکٹر ممتاز ہنجرا نے درخواست ضمانت پر سماعت کرنے کے اپنے ریمارکس میں کہا کہ ملزمہ کے خلاف ضمانت خارج کرنے کے کافی شواہد موجود ہیں۔ بادی النظر میں ملزمہ پر لگائے گئے الزامات درست ثابت ہوتے ہیں۔ ملزمہ فوری ضمانت کی حق دار نہیں ہے۔
واضح رہے کہ ملزمہ فرح موٹر وے پولیس اہل کار کو کار سے ٹکر مارتے ہوئے فرار ہو گئی تھی اورسوشل میڈیا پر ساڑھے 3 ماہ بعد وڈیو وائرل ہونے پر خاتون کو گرفتار کیا گیا ہے۔ ملزمہ کے خلاف کارِ سرکار میں مداخلت، مزاحمت، سرکاری اہل کار کو ٹکر مارنے اور زخمی کرنے کی دفعات کے تحت پیٹرولنگ آفیسر محمد صابر کی درخواست پر 2 جنوری 2024ء کو تھانہ نصیر آباد میں مقدمہ درج کیا گیا تھا۔