بھارت ہمیشہ پاکستان پر اپنی طاقت کی دھونس جماتا رہتا ہے اور بڑے بے تکے بینات بھی ہانک دیتا ہے مگر پاکستان کی مجبوری یہ ہے کہ بھارت میں بھی مسلمانوں کی ایک بہت بڑی تعداد آباد ہے اور مقبوضہ کشمیر میں تو بستے ہی صرف مسلمان ہیں جس کی وجہ سے پاکستان کے ہاتھ بندھے ہوئے ہیں
انٹر سروسز پبلک ریلیشنز کے ڈائریکٹر جنرل میجر جنرل بابر افتخار نے واضح طور پر بھارتی چیف آف آرمی سٹاف کے اس دعوے کو یکسر مسترد کر دیا ہے کہ لائن آف کنٹرول پر جنگ بندی اس لیے برقرار ہے کیونکہ بھارت نے “طاقت کی پوزیشن” پر مذاکرات کیے تھے۔
فوجی ترجمان نے جمعہ کو کہا کہ ایل او سی کے دونوں طرف رہنے والے کشمیری عوام کے تحفظ کے لیے پاکستان کے خدشات کی وجہ سے ہی اس پر اتفاق ہوا ہے۔ڈی جی آئی ایس پی آر کے آفیشل ٹویٹر اکاؤنٹ سے جاری ہونے والا یہ بیان ہندوستان کے اعلیٰ فوجی کمانڈر کے تبصرے کے جواب میں سامنے آیا ہے- جس نے ایل او سی پر تقریباً ایک سال طویل جنگ بندی برقرار رکھنے کا سہرا اپنے سرلےنے کی کوشش کی تھی ۔
ہندوستانی فوج کے سربراہ جنرل منوج مکھنڈ نروانے کا کہنا تھا کہ پاکستان کے ساتھ جنگ بندی جاری ہے کیونکہ ہم نے طاقت کی پوزیشن سے بات چیت کی۔ تاہم پاکستانی فوج کے ترجمان نے اس دعوے کو مسترد کرتے ہوئے کہا کہ کوئی بھی فریق اسے اپنی طاقت یا دوسرے کی کمزوری کے طور پر غلط نہ سمجھے
آئی ایس پی آر کے ایک بیان میں کہا گیا تھا کہ ملٹری آپریشنز کے دونوں ڈی جیز نے “باہمی فائدہ مند اور پائیدار امن” کے حصول کے لیے ہاٹ لائن رابطہ کیا تھا۔اس میں کہا گیا تھا کہ انہوں نے ایک دوسرے کے بنیادی مسائل اور خدشات کو دور کرنے پر اتفاق کیا جو امن کو خراب کرنے اور تشدد کی طرف لے جانے کا رجحان رکھتے ہیں۔