وزیراعظم عمران خان عوام کی سہولت کے لیے جلد ای پاسپورٹ سروس کا آغاز کریں گے: شیخ رشید
اسلام آباد: وزیر داخلہ شیخ رشید احمد نے منگل کو اعلان کیا کہ موجودہ حکومت جلد ہی ای پاسپورٹ سسٹم متعارف کرائے گی جس سے لوگوں کو سہولت ملے گی۔
اسلام آباد میں میڈیا سے گفتگو کرتے ہوئے انہوں نے کہا کہ وزیراعظم عمران خان روس سے واپسی کے بعد عوام کی سہولت کے لیے ای پاسپورٹ سروس کا آغاز کریں گے۔
شیخ رشید نے مزید بتایا کہ سندھ میں تیرہ نئے پاسپورٹ دفاتر کے ساتھ ساتھ چاروں صوبوں میں اٹھائیس نادرا شناختی کارڈ اسٹیشنز قائم کیے جائیں گے۔
وزیر داخلہ نے غیر ملکی فنڈنگ سے چلنے والے دہشت گردوں کو کچلنے کے حکومتی عزم کا اعادہ کیا۔ انہوں نے کہا کہ ردالفساد آپریشن نے ملک کو محفوظ بنایا اور ہم سیکیورٹی اہلکاروں کی قربانیوں کو خراج تحسین پیش کرتے ہیں۔
آسٹریلوی کرکٹ ٹیم کے آئندہ دورہ کے حوالے سے وزیر داخلہ کا کہنا تھا کہ سیکیورٹی کے بہترین انتظامات کیے گئے ہیں۔
ملک کی سیاسی صورتحال پر تبصرہ کرتے ہوئے شیخ رشید نے کہا کہ اپوزیشن جماعتوں کی احتجاجی مہم کا کوئی نتیجہ نہیں نکلے گا۔ انہوں نے پیشین گوئی کی کہ تحریک عدم اعتماد بھی ناکام ہو جائے گی۔
