توشہ خانہ کیس میں سزا پانے والے سابق وزیر اعظم عمران خان کی جیل میں ملاقاتوں شیڈول تیار کرلیا گیا ہے ۔ عمران خان کو اپنے وکلاء کے علاوہ اپنی پارٹی کے چندسینئر رہنماؤں کے ساتھ ملاقات کی اجازت مل گئی -عمران خان نے جیل میں بشریٰ بی بی سے بھی ملاقات کی خواہش کا اظہار کیا تھا مگر ابھی تک انہیں اس کی اجازت نہیں ملی تاہم قوی امکان ہے کہ بشریٰ بی بی کو بھی عمران خان سے ملاقات کی اجازت جلد مل جائے گی –
اٹک جیل کے حکام کا کہنا ہے کہ عمران خان کو ہفتے میں 4 مرتبہ 20 منٹ کے لیے ٹیلی فون پر بات چیت کرنے کی بھی اجازت ہوگی تاہم ابھی تک انہوں نے وہ 6 ٹیلی فون نمبرز فراہم نہیں کیے ہیں جن پر سابق وزیر اعظم بات کرنا چاہتے ہیں، عمران خان کے وکیل سے ملاقات کے بعد سوشل میڈیا پر حکومتی رویے پر بہت شور اٹھا جس کے بعد ے بعد سربراہ تحریک انصاف کو سابق وزراعظم ہونے کے سبب جیل میں بی کیٹیگری دے دی گئی ہے اور انہیں جیل مینیو کے مطابق کھانا فراہم کیا جارہا ہے ان کو ناشتے اور کھانے میں کیا دیا جارہا ہے یہ بھی میڈیا کے ساتھ شئیر کیا جارہا ہے ۔ حکام کا کہنا ہے کہ عمران خان فی الحال اپنے ذاتی کپڑے پہن رہے ہیں ، وہ جیل کا لباس پہنیں گے یا نہیں اس حوالے سے فیصلہ حکومت کرے گی۔ جیل انتظامیہ کا مزید کہنا تھا کہ اگر عمران خان کو جیل کے لباس سے الرجی ہوئی تو انہیں اپنے ذاتی کپڑے پہننے کی اجازت ہوگی۔
