وزیر خارجہ بلاول بھٹو زرداری نے او آئی سی اور اس کے رکن ممالک پر زور دیا ہے کہ وہ ہندوستانی مسلمانوں کی جان، عزت، جائیداد، ثقافت، ورثے اور مذہبی آزادی کے تحفظ کے لیے اپنی کوششیں تیز کریں۔
اتوار کو او آئی سی کے سیکرٹری جنرل حسین برہم طحہ کے ساتھ ٹیلی فونک گفتگو میں، انہوں نے تنظیم پر زور دیا کہ وہ بھارت میں اسلامو فوبیا کی بڑھتی ہوئی صورتحال کا فوری نوٹس لے۔
وزیر خارجہ نے پیغمبر اسلام ؐ کے خلاف توہین آمیز کلمات پر نماز جمعہ کے بعد پرامن احتجاجی مظاہروں کے ساتھ ہندوستانی حکام کے ناروا سلوک کی شدید مذمت کی۔
وزیر خارجہ نے مشاہدہ کیا کہ بی جے پی کے اعلیٰ عہدیداروں کے توہین آمیز ریمارکس نے دنیا بھر کے مسلمانوں کے جذبات کو شدید ٹھیس پہنچائی ہے۔
انہوں نے نوٹ کیا کہ بی جے پی کی جانب سے وضاحت کی کوشش، اور ذمہ دار افراد کے خلاف تاخیر سے کی جانے والی ‘انضباطی’ کارروائی، مسلم دنیا کے لیے جو درد اور اضطراب پیدا کر رہی تھی، اسے کم نہیں کر سکتی۔
او آئی سی کے سیکرٹری جنرل نے توہین آمیز ریمارکس کے ساتھ ساتھ ہندوستانی مسلمانوں کی نہ ختم ہونے والی حالت زار پر گہری تشویش کا اظہار کیا۔
دونوں فریقوں نے اسلامو فوبیا پر اقوام متحدہ اور او آئی سی کی قراردادوں اور اعلانات کو یاد کیا، اور ہندوستان میں اسلامو فوبیا کا مقابلہ کرنے اور ہندوستانی مسلمانوں کی تکالیف کو کم کرنے کے راستے تلاش کرنے کے لیے رابطے میں رہنے کا فیصلہ کیا۔