وزیر اعظم شہباز شریف نے رکے ہوئے منصوبوں کی بحالی سے بجلی کی لوڈشیڈنگ پر قابو پانے کے عزم کا اظہار کیا ہے۔
جمعہ کو اسلام آباد میں لوڈشیڈنگ پر قابو پانے کے اقدامات کا جائزہ لینے کے لیے منعقدہ اجلاس سے خطاب کرتے ہوئے انہوں نے کہا کہ تمام پاور پلانٹس کو فعال بنانے کے لیے کوششیں جاری ہیں۔
انہوں نے کہا کہ ان کی حکومت صارفین کی سہولت کے لیے بجلی کی لوڈشیڈنگ پر قابو پانے کے لیے ہر ممکن اقدامات کر رہی ہے۔
وزیراعظم نے کہا کہ گزشتہ حکومت کی خراب پالیسیوں کی وجہ سے توانائی کے شعبے میں چیلنجز کا سامنا ہے لیکن ہم ان سے نمٹنے کے لیے پرعزم ہیں۔
شہباز شریف نے افسوس کا اظہار کیا کہ پچھلی حکومت نے اس معاملے کو سنجیدگی سے نہیں لیا اور جب دنیا میں قیمتیں کم تھیں تو گیس سپلائی کے لیے خریداری کا کوئی معاہدہ نہیں کیا گیا۔
انہوں نے نشاندہی کی کہ گزشتہ حکومت کے دور میں پاور پلانٹس کی دیکھ بھال نہ ہونے کی وجہ سے بجلی کی قلت پیدا ہوئی۔
انہوں نے کہا کہ سابقہ حکومت نے حویلی بہادر شاہ پلانٹ میں بھی تاخیر کی جو 1250 میگاواٹ بجلی پیدا کرنے کی صلاحیت رکھتا ہے۔