سکھر: وزیر اعظم شہباز شریف سندھ کے سیلاب زدہ علاقوں میں جاری امدادی اور بحالی کی سرگرمیوں کا جائزہ لینے سکھر پہنچ گئے۔
سکھر بیگم نصرت بھٹو ایئرپورٹ پہنچنے پر وزیر خارجہ بلاول بھٹو زرداری، وزیر آبی وسائل سید خورشید شاہ اور وزیراعلیٰ سندھ سید مراد علی شاہ نے وزیراعظم کا استقبال کیا۔
پرواز کے دوران نیشنل ڈیزاسٹر مینجمنٹ اتھارٹی کے چیئرمین نے انہیں ریلیف اور بحالی کے جاری آپریشن کے بارے میں بریفنگ دی۔
وزیر اطلاعات مریم اورنگزیب نے ٹوئٹر پر بتایا کہ وزیراعظم سکھر، روہڑی، خیرپور، فیض گنج، کوٹ ڈیجی اور ٹھری میر واہ کے علاقوں کا فضائی دورہ کریں گے۔
بعد ازاں سکھر کی ضلعی انتظامیہ اور پراونشل ڈیزاسٹر مینجمنٹ اتھارٹی کے نمائندے وزیراعظم کو سیلاب سے متاثرہ افراد کی امداد اور انفراسٹرکچر کی بحالی کے لیے جاری کاموں کے بارے میں بریفنگ دیں گے۔
وہ سیلاب سے متاثرہ لوگوں سے بھی بات چیت کر کے جاری امدادی اور بحالی کے کاموں کا جائزہ لیں گے۔ بعد ازاں سندھ کے چیف سیکریٹری اور سکھر بیراج کے چیف انجینئر بھی وزیراعظم کو سیلاب سے ہونے والی تباہی سے آگاہ کریں گے۔
