وزیراعظم شہباز شریف نے متعلقہ حکام کو ہدایت کی ہے کہ گھریلو صارفین اور صنعتوں کو ریلیف دینے کے لیے سستی بجلی پیدا کرنے کا موثر نظام وضع کیا جائے۔
انہوں نے یہ ہدایات اسلام آباد میں افغانستان سے درآمد ہونے والے کوئلے کی نقل و حمل میں بہتری کے حوالے سے منعقدہ اجلاس کی صدارت کرتے ہوئے دیں۔
وزیراعظم نے وزارت ریلوے کو افغانستان سے درآمد شدہ کوئلے کی پاور پلانٹس تک فوری ترسیل کو یقینی بنانے کے لیے تمام ضروری اقدامات کرنے کی ہدایت کی۔
شہباز شریف نے کوئلے کی درآمد کے عمل کو تیز کرنے کے لیے وزیر دفاع خواجہ آصف کی سربراہی میں تمام متعلقہ حکام پر مشتمل کمیٹی بنانے کی ہدایت بھی کی۔
اجلاس کے دوران وزیراعظم کو بتایا گیا کہ افغانستان سے ساہیوال اور حب پاور پلانٹس کے لیے ابتدائی طور پر درکار کوئلے کے درآمدی بل میں سالانہ 2.2 ارب ڈالر سے زائد کی بچت ہوگی۔
بین الاقوامی منڈی میں کوئلے کی بڑھتی ہوئی قیمت پر تشویش کا اظہار کرتے ہوئے وزیراعظم نے اسے ملک میں کوئلے سے چلنے والے پاور پلانٹس سے مہنگی بجلی کی پیداوار کی بڑی وجہ قرار دیا۔
وزیراعظم نے ملک کا قیمتی زرمبادلہ بچانے کے لیے افغانستان سے ڈالر کی بجائے روپے میں اعلیٰ معیار کا کوئلہ درآمد کرنے کی بھی منظوری دی۔ اس سے نہ صرف سستی بجلی پیدا ہوگی بلکہ ملک کا قیمتی زرمبادلہ بچانے میں بھی مدد ملے گی۔
