کوئٹہ: وزیر اعظم شہباز شریف نے متعلقہ حکام کو بلوچستان کے سیلاب سے متاثرہ افراد کو مالی امداد کی فوری فراہمی کو یقینی بنانے کی ہدایت کی ہے۔
وزیراعظم نے یہ ہدایت صوبے میں سیلاب سے متاثرہ افراد کی رہائش کے لیے ضلع قلعہ سیف اللہ کے علاقے خوشنوب میں قائم کیے گئے ٹینٹ سٹی کے دورے کے دوران جاری کی۔
انہوں نے نیشنل ڈیزاسٹر اینڈ منیجمنٹ اتھارٹی (این ڈی ایم اے) اور صوبائی ڈیزاسٹر مینجمنٹ اتھارٹی (پی ڈی ایم اے) سے متاثرین کی بہترین سہولت کے لیے راحت اور بچاؤ کی کارروائیوں کو تیز کرنے کے لیے کہا۔
وزیراعلیٰ بلوچستان عبدالقدوس بزنجو اور چیئرمین این ڈی ایم اے لیفٹیننٹ جنرل اختر نواز نے وزیراعظم کو بلوچستان میں طوفانی بارشوں سے ہونے والے نقصانات سے آگاہ کیا۔
بتایا گیا کہ سیلاب سے متاثرہ افراد کے لیے طبی سہولیات کے ساتھ چار کیمپ قائم کیے گئے ہیں اور پانی کی ضروریات کو پورا کرنے کے لیے علاقے میں ایک ٹیوب ویل کا نظام شمسی توانائی سے کام کر رہا ہے۔
اس موقع پر وزیر اعظم شہباز شریف نے کہا کہ حکومت نے جزوی اور مکمل طور پر تباہ ہونے والے گھروں کے لیے مالی امداد کی رقم بڑھا کر 5 لاکھ روپے کر دی ہے۔
وزیراعظم نے کمیونیکیشن انفراسٹرکچر کو کھولنے کے علاوہ ریلیف اور بحالی کی سرگرمیوں کے دوران نیشنل ہائی وے اتھارٹی کی کوششوں کو سراہا۔
انہوں نے متعلقہ حکام کو ہدایت کی کہ سیلاب سے متاثرہ علاقوں میں میڈیکل کیمپوں میں اضافہ کیا جائے تاکہ لوگوں کو بروقت طبی سہولیات میسر آئیں۔ انہوں نے مزید کہا کہ وفاقی اور صوبائی حکومتیں ہر متاثرہ خاندان کی مکمل بحالی کے لیے پرعزم ہیں۔
دورے کے دوران وزیراعظم نے ٹینٹ سٹی میں سیلاب سے متاثرہ افراد سے ملاقات کی اور ان سے فراہم کی جانے والی سہولیات کے بارے میں دریافت کیا۔