وزیراعظم عمران خان نے متعلقہ حکام کو زمین کی فراہمی کے لیے ہر ممکن اقدامات کرنے کی ہدایت کی ہے۔تاکہ زیادہ سے زیادہ چینی کمپنیاں پاکستان میں سرمایہ کاری کریں اور خصوصی اقتصادی زون کو آباد کریں۔
وزیر اعظم نے کہا کہ پاکستان کو صنعت کاری میں تیزی لانے کے لیے سرمایہ کاری کی ضرورت ہے۔
انہوں نے مزید کہا کہ ہماری بڑھتی ہوئی آبادی کے لیے روزگار کے زیادہ سے زیادہ مواقع پیدا کرنا انتہائی ضروری ہے ، جن میں سے 65 فیصد 35 سال سے کم عمر کے ہیں۔
ممکنہ چینی سرمایہ کاروں کے تمام مسائل کو ایک چھت تلے حل کرنے کے لیے چین،پاکستان اکنامک کوریڈور (CPEC) اتھارٹی میں ایک سہولت مرکز کے ساتھ ان ایس ای زیڈ’ز میں ایک مؤثر ون ونڈو آپریشن سہولت قائم کی جا رہی ہے۔
اس موقع پر پاکستان میں چین کے سفیر نونگ رونگ ، وفاقی وزراء شوکت ترین ، مخدوم خسرو بختیار ، اسد عمر ، محمد حماد اظہر ، وزیراعظم کے مشیر برائے تجارت عبدالرزاق داؤد ، وزیراعظم کے معاون خصوصی برائے سی پیک امور خالد منصور اور سینئر حکام موجود تھے۔
