وزراء کے بیرون ملک دوروں پر فائیو سٹار ہوٹل میں قیام پر پابندی

وفاقی حکومت نے وزراء اور افسران کے بیرون ملک دوروں کے دوران فائیو سٹار ہوٹل میں قیام پر پابندی عائد کردی ہے۔تفصیلات کے مطابق کابینہ ڈویژن نے وفاقی کابینہ کے فیصلوں کی روشنی میں کفایت شعاری پالیسی کا اجرا کرتے ہوئے وزراء اور سرکاری افسران کے بیرون ملک دوروں کے دوران فائیو سٹار ہوٹل میں قیا م پر پابندی عائد کردی ہے جبکہ افسران کو ناگزیر وجوہات پر ہی بیرون ملک سفر کی ہدایت کی گئی ہے ۔پالیسی کے مطابق بیرون ملک دوروں پر ٹیلی کانفرنسنگ کو ترجیح دی جائیگی جبکہ وفاقی وزرا، وزیر مملکت، مشیر، معاونین، سیکرٹریز، ایڈیشنل سیکرٹریز اور انچارج ڈویژنز کے سرکاری دورے وزیر اعظم کی منظوری سے مشروط ہوں گے۔ 20ویں یا اوپر کے گریڈ کے افسران اور تین ممبران کے وفد کی اجازت متعلقہ وزیر سے لی جائے گی، پالیسی کے مطابق بیرون ملک دوروں کی تمام تفصیلات وزارت خارجہ کو فراہم کرنا لازمی ہوں گی،اس کے ساتھ ہی وزیر اور سیکرٹری کے ایک ہی وقت بیرون ملک دوروں پر بھی پابندی عائد کی گئی ہے، ناگزیر وجوہات پر دونوں کو بیک وقت بیرون ملک دورے کی اجازت دی جا سکے گی جبکہ استثنیٰ کیلئے متعلقہ وزیر یا ڈویژن کو وزیراعظم سے اجازت لینا ہوگی۔بیرون ممالک کانفرنسز میں حتی الامکان کوشش کی جائے کہ سفارتخانہ کے افسران شرکت کریں۔ دستاویزات کے مطابق وفاقی وزرائ، وزرائے مملکت ،مشیر اور معاونین سال میں بیرون ممالک کے 3دورے کرنے کے مجاز ہوں گے لیکن وزارت خارجہ اور وزارت تجارت کو اس پابندی سے استثنیٰ ہوگا۔دستاویزات کے مطابق صدر ،چیف جسٹس چیئرمین جوائنٹ چیفس آف سٹاف کمیٹی اور سروسز چیف ہی فرسٹ کلاس سفری سہولیات کے مجاز ہوں گے جبکہ وزیر اعظم، چیئرمین سینیٹ، سپیکر قومی اسمبلی بزنس کلاس کے مجاز ہوں گے۔ وزیر خارجہ، وفاقی وزرا اور وزیر مملکت بھی بزنس کلاس میں سفر کریں گے۔دستاویز کے مطابق قومی اسمبلی اور سینیٹ اجلاسوں کے دوران کابینہ ارکان بیرون اور اندرون ملک سفر کرنے سے گریز کریں گے۔پالیسی کے مطابق بیرون ممالک دوروں کی تمام تفصیلات 15روز میں وزارت خارجہ میں جمع کروانا لازمی ہوگا اور ایسے ممالک کے ساتھ رابطہ نہیں کیا جائیگا جن سے پاکستان کے سفارتی تعلقات نہیں ہیں،پالیسی میں بیرون ملک دوروں کیلئے پی آئی اے کو پہلی ترجیح قراردیا گیا ہے جبکہ بھارت کے دورے کیلئے وزارت داخلہ اور وزارت خارجہ سے اجازت لینا لازمی قرار دیا گیا ہے۔ اسلام آباد (انٹرنیوز)