بھارت کے شہر حیدر آباد دکن کے سٹیڈیم میں کھیلے گئے پہلے میچ میں پاکستان نے نیدر لینڈز کو 81 رنز کے بڑے مارجن سے شکست دے دی ۔ پاکستان نے پہلے بیٹنگ کرتے ہوئے 286سکور بنائے اور تمام کھلاڑی آوٹ ہو گئے جواب میں نیدر لینڈز کی ٹیم 205رنز بنا کر ڈھیر ہو گئی۔
حیدر آباد دکن میں کھیلے جارہے آئی سی سی مینز کرکٹ ورلڈ کپ میں ٹیم پاکستان نے اپنی مہم کا آغاز �اچھی فتح کےساتھ کردیا ، جہاں نیدرلینڈز نے پاکستان کے خلاف ٹاس جیت کر پہلے فیلڈنگ کا فیصلہ کیا۔پاکستان کی جانب سے اننگز کا آغازاوپننگ بیٹر فخر زمان اور امام الحق نے کیا تاہم پاکستانی بیٹر اننگز کے آغاز سے نیدرلینڈز کے باولرز کا سامنا کرنے میں مشکل کا شکار رہے ، فخر زمان 12، کپتان بابر اعظم 5 اور امام الحق 15 رنز بناکر کیچ آؤٹ ہوگئے۔قومی ٹیم کا ٹاپ آرڈر ناکام ہونے کے بعد محمد رضوان اور سعود شکیل نے ٹیم کو سنبھالا ۔سعود شکیل نے بہترین بیٹنگ کا مظاہرہ کرتے ہوئے 32 گیندوں پر شاندار ففٹی سکور کی۔
انہوں نے 7 چوکے اور ایک چھکا لگایا۔ان کا ساتھ محمد رضوان اور پھر شاداب اور محمد نواز نے دیا -اگرچہ پاکستانی ٹیم 50 اوور تو نہ کھیل سکی تاہم ایک فائٹنگ سکور بنانے میں کامیاب ہوگئی -اس کے جواب میں نیدر لینڈ نے بہتر آغاز کیا اوپنر نے نصف سنچری سکور کی مگر اس پارٹنرشپ کے ٹوٹتے ہی نیدر لینڈکی ٹیم اعتماد کھو بیٹھی اور پاکستان کے سب باؤلرز کے حصے میں وکٹیں آئیں – نیدر لینڈ کے وکرم جیت سنگھ نے 52اور بس ڈی لیڈی نے 67 سکور بنائے جبکہ ان دونوں کے علاوہ کوئی بھی بلے باز قابل ذکر سکور نہ کر سکا۔ پاکستان کی جانب سے حارث روف نے تین، حسن علی نے دو جبکہ شاہین آفریدی ، شاداب خان ، محمد نواز اور افتخار احمد نے ایک ، ایک وکٹ حاصل کی۔