نگران وزیر اعظم کی تعیناتی پر تنقید خورشید شاہ کو مہنگی پڑگئی ؛پارٹی ناراض ،شو کاز نوٹس جاری

کل جب نگران وزیراعظم کا نام میڈیا پر آیا تو سب سے پہلے خورشید شاہ کی جانب سے ان کی تعیناتی کے فیصلے پر ناپسندیدگی کا اظہار کیا گیا تھا اور یہ پیغام دیا گیا تھا کہ اس میں پیپلز پارٹی کی مرضی شامل نہیں تھی – خورشید شاہ نے نگران وزیراعظم سے متعلق کہا تھا کہ ہمیں علم نہیں تھا نگران وزیراعظم کیلئے انوار الحق کاکڑ کا نام آئے گا، انوار الحق کاکڑ کا نام سینیٹ سے لیا گیا ہے، بہتر ہوتا ہم کسی اور شخص کا انتخاب کرتے۔ ان کے اس بیان پر پیپلزپارٹی کی قیادت سینئر رہنما اور سابق اپوزیشن لیڈر خورشید شاہ کے نگران وزیر اعظم سے متعلق بیان پر ناراض ہوگئی ہے۔ پارٹی کا کہنا ہے کہ خورشید شاہ نے نگران وزیراعظم کے بارے میں بیان پارٹی قیادت سے مشاورت کے بغیر دیا جس کی اجازت نہیں ہے –

پیپلزپارٹی قیادت خورشید شاہ کے نگران وزیراعظم سے متعلق بیان پر برہم#ARYNewsUrduhttps://t.co/P2TLZnwtVI

— ARY News Urdu (@arynewsud) August 13, 2023

پیپلز پارٹی کی قیادت نے خورشید شاہ سے نگران وزیراعظم سے متعلق بیان پر جواب طلبی کی ہے، اس کے بعد پیپلز پارٹی کے لیے مسائل پیدا ہوئے اور پیپلزپارٹی کو اپنے ترجمانوں سے بیان جاری کروانا پڑا تھا۔ خورشید شاہ کے بیان کے بعد پی پی قیادت نے پارٹی رہنماؤں کو نگران وزیراعظم کے بارے میں بیان بازی سے روک دیا، قیادت کا کہنا ہے کہ نگران وزیراعظم کا معاملہ حساس ہے، غیر ضروری بیانات نہ دیے جائیں۔