نواز شریف کی واپسی ڈیل کے تحت ممکن ہوئی ؛راجہ پرویز اشرف

پاکستان پیپلز پارٹی فوج اور اپنی اتحادی جماعت نون لیگ سے نالاں نظر آرہی ہے اور اب وہ اس بات کا کھل کر اظہار بھی کررہی ہے کہ نون لیگ نے ان کے ساتھ جو وعدے کیے تھے وہ پورے نہیں کیے -یہ بات کوئی اور نہیں پیپلز پارٹی کے سابق وزیراعظم اور شہباز شریف کے دور حکومت میں 16 ماہ تک سپیکر کی کرسی سنبھالنے والے راجہ پرویز اشرف قوم کے سامنے رکھ رہے ہیں -ان کا دعویٰ کیا ہے کہ مسلم لیگ ن کے قائد نواز شریف کی واپسی سمجھوتے کے تحت ممکن ہوئی ہے۔
صحافیوں سےغیر رسمی گفتگو میں سپیکر قومی اسمبلی راجہ پرویز اشرف نے کہا کہ کوئی اعتماد سازی ہوئی ہوگی تبھی تو نواز شریف واپس آ رہے ہیں، اب نواز شریف کی صحت بھی ٹھیک رہنی چاہیے۔ صحافی کے الیکشن سے متعلق سوال پر ان کا کہنا تھا کہ یہ آپ بتائیں کہ الیکشن ہو رہے ہیں؟ اس پر سابق وزیراعظم کا کہنا تھا کہ پیپلزپارٹی کا مزاج بہت ٹھنڈا اور بہتر رہا ہے، اگر پیپلز پارٹی لیول پلیئنگ فیلڈ کی بات کر رہی ہے تو سمجھیں واقعی کچھ تو ہے۔راجہ پرویز اشرف نے گلہ کرتے ہوئے کہا کہ وفاق اور پنجاب کی کابینہ میں ن لیگ کے لوگ شامل ہیں، ن لیگ کے آج بھی تمام کام ہو رہے ہیں، ہمارے خلاف نیب کے جھوٹے مقدمے بنائے گئے ہیں، میرے خلاف نیب کے کیسز میں نیب کے پاس کوئی ثبوت نہیں، مقدمات کا سامنا کرنے کیلئے تیار ہیں۔ماضی کی حکومت کا اہم ترین اتحادی ہونے کے ناطے پیپلز پارٹی بہت کچھ جانتی ہے اور اب وقت گزرنے کے ساتھ ساتھ وہ مزید گلے شکوے بھی کریں گے -لیول پلیئنگ فیلڈکے طعنے بھی دیں گے جس کا نون لیگ کو بہت نقصان ہوسکتا ہے -کیونکہ تحریک انصاف مسلسل شور مچارہی ہےکہ نون لیگ ڈیل کے ذریعے الیکشن میں حصہ لے رہی ہے الیکشن میں دھاندلی ہوگی –