یوں تو جون کا موسم اب تک بہت ٹھنڈا گزرا ہے کل بھی پاکستان کے مختلف شہروں میں آندھی اور بارش سے گرمی کی شدت میں کمی آئی مگر آج محکمہ موسمیات نے اپنی جاری کردہ موسمی ایڈوائزری میں کہا، “بالائی فضا میں زیادہ دباؤ کی موجودگی کی وجہ سے، 20 جون سے 24 جون تک ملک کے بیشتر حصوں میں دن کے درجہ حرارت میں بتدریج اضافہ ہونے کا امکان ہے۔”
محکمہ موسمیات کے مطابق بالائی اور وسطی پنجاب، اسلام آباد، بالائی خیبرپختونخوا، گلگت بلتستان اور کشمیر میں دن کا درجہ حرارت معمول سے چار سے چھ ڈگری سینٹی گریڈ زیادہ رہنے کا امکان ہے۔
اس کے ساتھ ساتھ سندھ، جنوبی پنجاب اور بلوچستان کے کچھ حصوں میں پارہ معمول سے دو سے چار ڈگری سینٹی گریڈ زیادہ رہے گا۔
البتہ ایک اچھی خبر یہ ہے کہ ملک کے میدانی علاقوں اور پہاڑی علاقوں میں بعض مقامات پر گرج چمک کے ساتھ گرد آلود ہوائیں چلنے کی توقع ہے۔
درجہ حرارت میں اضافے کی وجہ سے آنے والے دنوں میں بجلی اور پانی کی مانگ بڑھ سکتی ہے جس کی وجہ سے ایرکنڈیشنرز کے استعمال کے سبب ملک میں لوڈشیڈنگ بھی بڑھنے کا امکان ہے -۔
پی ایم ڈی نے کسانوں کو بھی مشورہ دیا کہ وہ اس کے مطابق فصلوں کے پانی کا انتظام کریں۔ اس کے ساتھ ساتھ عوام کو مشورہ دیا گیا کہ وہ براہ راست سورج کی روشنی میں غیر ضروری نکلنے سے گریز کریں اور پانی کا زیادہ استعمال کریں تاکہ ڈی ہائیڈریشن سے بچے رہیں ۔