اسلام آباد: بھارتی فوجیوں نے بدھ کو اپنی ریاستی دہشت گردی کی تازہ کارروائی میں مقبوضہ وادی کے ضلع پلوامہ میں دو کشمیریوں کو شہید کردیا۔
کشمیر میڈیا سروس کے مطابق، کشمیریوں کو بھارتی فوجیوں نے نیم فوجی دستوں اور پولیس اہلکاروں کے ساتھ ضلع کے علاقے قصبہ یار میں نام نہاد محاصرے اور تلاشی کی کارروائی کے دوران شہید کیا۔
ایک سینئر پولیس افسر نے بھی بھارت کے غیر قانونی طور پر مقبوضہ جموں و کشمیر میں دو نوجوانوں کی ہلاکت کی تصدیق کی۔
گزشتہ ہفتے، پاکستان نے بھارت کی ریاستی دہشت گردی اور جعلی مقابلوں اور نام نہاد “کورڈن اینڈ سرچ آپریشنز” میں معصوم کشمیریوں کے ماورائے عدالت قتل کی شدید مذمت کی تھی۔
بھارتی قابض افواج نے وادی میں دو ماہ سے بھی کم عرصے میں 35 کشمیریوں کو شہید کیا۔ سری نگر میں 24 نومبر کو ایک فرضی تصادم کے دوران مزید تین شہریوں کو شہید کیا گیا۔
دفتر خارجہ (ایف او) نے ایک بیان میں اس بات کا اعادہ کیا تھا کہ بھارتی قابض افواج کشمیریوں کے خلاف سنگین جرائم کا ارتکاب کر رہی ہیں جن میں جبری گمشدگیاں، ٹارگٹ اور ماورائے عدالت قتل اور آبادی کو اجتماعی سزائیں دینا شامل ہیں۔
ایف او نے زور دے کر کہا کہ وحشیانہ طاقت کا استعمال کشمیری عوام کی خواہش کو توڑنے میں کبھی کامیاب نہیں ہو سکتا، جو کہ ان کے ناقابل تنسیخ حق خودارادیت کے لیے جدوجہد کر رہے ہیں جیسا کہ یو این ایس سی کی متعلقہ قراردادوں میں درج ہے۔