مفت گندم کا آٹا 25 رمضان تک تقسیم کیا جائے گا: وزیراعظم
لاہور: وزیر اعظم شہباز شریف نے اعلان کیا ہے کہ مستحق شہریوں میں 25 رمضان تک گندم کے آٹے کی مفت تقسیم جاری رہے گی۔
وزیر اعظم شہباز شریف نے ہدایت کی کہ ایسے مستحق افراد کی فوری رجسٹریشن کو یقینی بنایا جائے جو ابھی تک بی آئی ایس پی میں رجسٹرڈ نہیں ہیں تاکہ حکومت کی جانب سے گندم کا آٹا مفت تقسیم کیا جا سکے۔
جمعہ کو لاہور میں رمضان پیکیج کے جائزہ اجلاس کی صدارت کرتے ہوئے انہوں نے نادرا اور بی آئی ایس پی کو ہدایت کی کہ وہ آٹے کی تقسیم کے مقامات پر رجسٹریشن کے لیے اپنے کاؤنٹرز قائم کریں۔
وزیراعظم نے کہا کہ حکومت رمضان المبارک میں غریب عوام کی مشکلات کم کرنے کے لیے ہر ممکن اقدامات کر رہی ہے۔
انہوں نے کہا کہ آٹے کی مفت تقسیم 25 رمضان تک جاری رہے گی۔ اجلاس کو بتایا گیا کہ آٹے کی مفت تقسیم کی سکیم پنجاب، خیبرپختونخوا اور اسلام آباد کیپٹل ٹیریٹری میں جاری ہے۔
ریڈیو پاکستان کی خبر کے مطابق، بتایا گیا کہ پنجاب میں شادی ہالز میں ڈسٹری بیوشن پوائنٹس قائم کیے گئے ہیں، جہاں لوگوں کو اپنی باری کا انتظار کرتے ہوئے اشیاء حاصل کرنے میں کسی قسم کی پریشانی کا سامنا نہیں کرنا پڑتا۔
واضح رہے کہ وزیراعظم شہباز شریف نے آج لاہور اور قصور میں آٹے کی تقسیم کے مقامات کا اچانک دورہ کیا اور انتظامات پر اطمینان کا اظہار کیا۔
انہوں نے اس پروگرام میں پنجاب اور خیبرپختونخوا حکومتوں کے تمام محکموں اور حکام کے ساتھ ساتھ اسلام آباد انتظامیہ کی خدمات کو سراہا۔
اجلاس میں وفاقی وزراء شازیہ مری اور مریم اورنگزیب، وزیراعظم کے مشیر احد چیمہ، وزیراعلیٰ پنجاب سید محسن نقوی اور دیگر اعلیٰ حکام نے شرکت کی۔