مریم نواز نے جب سے وزیراعلیٰ کی کرسی سنبھالی ہے وہ عوام میں جانے اور ان سے تعلق بڑھانے کی ہرممکن کوشش کررہی ہیں – آج انھوں نے اپنا ذاتی ہیلی کاپٹر ایمرجنسی حالت میں مریضوں کو دینے کا فیصلہ کیا ہے مگر جس طرح کے ملک کے حالات ہیں اگر وہ اس فیصلے کو برقرار نہ رکھ پائیں تو انہیں بہت زیادہ تنقید کا سامنا کرنا پڑے گا -لیکن یہ ایک اچھا فیصلہ ہے جس کی تعریف بنتی ہے ،مریم نواز نے مریضوں کی ایمرجنسی منتقلی کیلئے اپنے ہیلی کاپٹر کے استعمال کی اجازت دے دی۔
روزنامہ جنگ کے مطابق وزیراعلیٰ پنجاب مریم نواز کی زیر صدارت اجلاس ہوا جس میں ایئر ایمبولینس پراجیکٹ پر بریفنگ دی گئی۔ وزیراعلیٰ مریم نواز نے کہا کہ لوگ بروقت اسپتال نہ پہنچنے پر زندگی کی بازی ہار جاتے ہیں، دور دراز علاقوں میں حادثے پر متاثرین کو بر وقت اسپتال پہنچانا ناگزیر ہے۔انہوں نے کہا کہ سرگودھا اسپتال میں ہارٹ اٹیک کے مریض کو بےبس دیکھ کر دلی دکھ ہوا، پنجاب میں بہت جلد ایئر ایمبولینس سروس شروع کردی جائے گی۔
مریم نواز شریف موٹر وے پر بھی ریسکیو 1122سروس شروع کرنے کا مشورہ دیا ۔علاوہ ازیں وزیراعلیٰ مریم نواز کی زیر صدارت پنجاب بورڈ آف انویسٹمنٹ اینڈ ٹریڈ پراجیکٹ سے متعلق بھی اجلاس ہوا جس میں سرمایہ کاری کےفروغ کیلئے پلان طلب کرلیا اور مارکیٹ کی ضروریات کا تعین کر کے انڈسٹریل سیکٹرز کی نشاندہی کی ہدایت کی۔
انہوں نے سرمایہ کاروں کو محفوظ انویسٹمنٹ کے مواقع فراہم کرنے کیلئے میپنگ کا حکم بھی دیا اور کہا کہ پنجاب میں موجودصنعتوں کا ڈیٹا اور فیوچر انڈسٹری کے اعداد و شمار بھی مرتب کیے جائیں۔مریم نواز کا کہنا تھا کہ سرمایہ کاروں کو ہر طرح کی سہولت اور آسانی فراہم کی جائے ۔مریم نواز کو چاہیے کہ وہ عوام میں ضرور جائیں مگر اس دوران فوٹو شوٹ سے خود کو دور رکھیں کیونکہ ایسا کرنے سے یہ تاثر جائے گا کہ وہ یہ سب کام محض اپنی پروموشن کے لیے کررہی ہیں –
