محرم میں امن و امان کیلئے خطرہ بننے والے شر پسندافراد کی فہرستیں طلب

یون تو محرم الحرام وہ مقدس مہینہ ہے جس کی حرمت سب مسلمانون پر لازم ہے اور 99 فیصد مسلمان خواہ وہ کسی بھی فرقے سے تعلق رکھتے ہوں آقا حسین سے عقیدت رکھتے ہین مگر اس میں کچھ شرپسند اپنا چورن بیچنے کےلیے شرانگیز تقاریر کرتے ہیں جس کی سزا اس علاقے کے لوگ بھگتے ہیں اسی لیے حکومت ایسے افراد پر نظر بھی رکھتی ہے اور ان کو شعلہ بیانی سے باز رکھنے کے لیے انہیں مسجدوں اور امام بارگاہوں میں جانے کی اجازت نہیں دیتی جو بہت اچھا فیصلہ ہے –
محکمہ داخلہ پنجاب نے محرم الحرام کے دوران امن وامان کے قیام کے حوالے سے اہم اقدام اٹھا لیا۔
ترجمان محکمہ داخلہ پنجاب نے امن و امان کیلئے خطرہ بننے والوں کی ضلع بندی کیلئے فہرستیں طلب کرتے ہوئے ڈپٹی کمشنرز کو 24 گھنٹوں میں سفارشات بھجوانے کی ہدایت کی ہے، جس کے بعد فرقہ واریت کو ہوا دینے والے مقررین کی زبان بندی کے احکامات بھی جاری ہوں گے۔ادھر محکمہ داخلہ پنجاب نے محرم الحرام کے جلوسوں کیلئے ایس او پیز بھی جاری کر دیئے۔ایس او پیز میں کہا گیا کہ صرف منظور شدہ روٹس پر جلوس کی اجازت ہوگی، ہیڈ سے ٹیل تک سکیورٹی کور دیا جائے گا، ہر جلوس کے روٹ کو سکیورٹی ادارے، انتظامیہ اور امن کمیٹی پیشگی کلیئر کرے گی، جلوس کے راستوں میں لائیو کوریج کیلئے سرویلنس کیمرے نصب کئے جائیں گے۔ہدایت کی گئی کہ شرکاءصرف مختص کردہ راستے سے مکمل چیکنگ کے بعد جلوس میں شامل ہوں، جلوس کے راستوں پر ضرورت کے مطابق جیمرز نصب کئے جائیں گے، جلوس کے راستے میں کسی سویلین کو کوئی ہتھیار رکھنے کی اجازت نہیں ہوگی، وقت کی پابندی لازم اور جلوس کا اختتام مغرب سے پیشتر کیا جائے گا۔ترجمان محکمہ داخلہ نے کہا کہ جلوس کے راستوں پر کوئی شہری چھت پر نہ آئے اور مالک مکانوں سے کرایہ داروں بارے سرٹیفکیٹ لیا جائے، شبیہ ذوالجناح اور تعزیوں کی محفوظ واپسی تک سکیورٹی کور موجود رہے گا۔محکمہ داخلہ پنجاب کے مطابق صوبہ بھر میں حساس مقامات کی کڑی نگرانی کے احکامات بھی جاری کئے گئے ہیں۔