لاہور: لاہور ہائی کورٹ نے منگل کے روز پنجاب حکومت کو تمام ٹی وی چینلز پر سموگ سے متعلق آگاہی مہم چلانے کا حکم دے دیا تاہم اس مہم کو اپنی تشہیر کے لیے استعمال کرنے سے روک دیا۔
جسٹس شاہد کریم نے یہ حکم ایڈووکیٹ شیراز ذکاء کی جانب سے سموگ پر قابو پانے کے لیے بروقت اقدامات نہ کرنے کے خلاف دائر مختلف درخواستوں پر جاری کیا۔
عدالت نے پنجاب حکومت کو سموگ آگاہی مہم میں اپنا یا اپنے کسی کارکن کا نام لینے سے گریز کرنے کی ہدایت کی۔
جسٹس کریم نے کہا کہ حکومت اکثر اشتہارات اپنی تشہیر کے لیے استعمال کرتی ہے لیکن سموگ سے آگاہی مہم خاص طور پر عوامی مفاد میں ہوگی۔
عدالت نے پنجاب ڈیزاسٹر مینجمنٹ اتھارٹی کو سموگ آگاہی مہم کے لیے پیمرا کو مواد فراہم کرنے کی ہدایت کی۔
سماعت کے دوران عدالت نے یک طرفہ خلاف ورزی پر میئر لاہور کی جانب سے 2 ہزار روپے سے کم جرمانے کی درخواست مسترد کردی۔
جسٹس کریم نے ریمارکس دیے کہ نتائج تب ہی سامنے آئیں گے جب تمام سرکاری افسران اور عوام مل کر سموگ کے خلاف کام کریں۔
لاہور کے چیف ٹریفک پولیس افسر کو پاکستان سپر لیگ کے لیے ٹریفک پلان پیش کرنے کو بھی کہا گیا۔ عدالت نے سماعت 16 دسمبر تک ملتوی کر دی۔
