لاہور: لاہور پولیس نے بدھ کے روز صحافی حسنین شاہ کے قتل کیس کے مرکزی ملزم کو گرفتار کرنے کا دعویٰ کیا ہے۔
ایک نجی ٹیلی ویژن (ٹی وی) سے بطور کرائم رپورٹر وابستہ حسین شاہ کو پیر کو لاہور پریس کلب (ایل پی سی) کے قریب دو نامعلوم موٹر سائیکل سواروں نے فائرنگ کر کے قتل کر دیا۔ جس کے بعد سول لائنز پولیس نے نامعلوم ملزمان کے خلاف مقدمہ درج کر لیا۔
پولیس ذرائع کے مطابق ملزم کی شناخت عامر بٹ کے نام سے ہوئی جسے جیل روڈ پر ایک شوروم سے گرفتار کیا گیا۔ بعد ازاں ملزم کو مزید تفتیش کے لیے لاہور پولیس کی کرائم انویسٹی گیشن ایجنسی (سی آئی اے) کے حوالے کر دیا گیا۔
پولیس حکام نے دعویٰ کیا کہ صحافی کو کرائے کے قاتلوں نے قتل کیا جب کہ اس سے قبل لاہور پولیس کا کہنا تھا کہ اس نے صحافی کے قتل کیس میں تین ملزمان کے خلاف مقدمہ درج کیا تھا۔
منگل کے روز مقتول کرائم رپورٹر کی نماز جنازہ بھی ایل پی سی کے سامنے ادا کی گئی جس میں صحافیوں اور سول سوسائٹی کے افراد کی بڑی تعداد نے شرکت کی۔ پنجاب حکومت کے ترجمان حسن خاور بھی شرکاء میں شامل تھے۔
