پاکستان کی معروف اداکارہ ہانیہ عامر نے شوبز کیرئیر اپنانے کے بعد پیش آنے و الی مشکلات کے بارے مین اپنا دل کھول کر رکھ دیا اور بتایا کہ جب وہ چھوٹی تھیں تو ان کے والدین میں علیحدگی ہوگئی تھی اس کے بعد وہ پہلے اپنے والد اور ان کے رشتے داروں کے پاس رہین اور پھر اپنی والدہ اور چھوٹی بہن کے ساتھ رہنے لگیں، شروعات میں ان کے ننہیال کی جانب سے انہیں خاصا سپورٹ کیا گیا۔اداکارہ ہانیہ نے اپنی شو بز زندگی میں پیش آنے والے مختلف حالات اور واقعات پر بھی لب کشائی کی اور ایک حیران کن انکشاف کیا کہ شوبز کیرئیر اپنانے کے بعد خاندان کی جانب سے قطع تعلقی کرلی گئی تھی –
ہانیہ نے فلم جاناں سے شوبز کیرئیر کے آغاز کے حوالے سے کہا کہ جب میں نے فلم جاناں کے لیے آڈیشن دیا تو میری سلیکشن ہاتھوں ہاتھ ہوگئی اور مجھے کنٹریکٹ بھی تھمادیا گیا جس پر میں نے بغیر پڑھے ہی دستخط کردیے تھے اور جب والدہ کو گھر آکر بتایا کہ فلم سائن کردی ہے تو وہ حیران ہوگئیں مگر ماموں کا ردعمل کا سوچ کر انکار کردیا۔
ہانیہ نے بتایا کہ اس کے بعد میں نے والدہ کو منایا کہ فلم اب سائن کی جاچکی ہے اس کے بعد کوئی فلم نہیں کروں گی لیکن یہ فلم کرنے دیں لہٰذا والدہ یہ کہہ کر مان گئیں کسی کو پتا نہ چلے ۔ مگر میں نے والدہ کے منع کرنے کے باوجود شوٹنگ کی ویڈیوز روزانہ انسٹا پر پوسٹ کرنا شروع کردیں اس کے بعد ماموں اور خاندان کے دیگر افراد گھر آئے، تلخ کلامی ہوئی ، عزت پر بھی بات آئی اور لڑائی ہوئی جس کے بعد خاندان میں دشمنی پھیل گئی۔
ہانیہ عامر نے کہا کہ اس واقعے کے بعد میں نے اپنی فیملی کی ذمہ داریاں خود اٹھانے کا فیصلہ کیا اور جب سے اب تک میں اپنا گھر خود چلا رہی ہوں، ۔اداکارہ کا کہنا تھا کہ اگرچہ اب رشتہ دار ملتے ہیں پہلے جیسا تناؤ تو نہیں ہے لیکن دوریاں موجود ہیں، آج بھی میں بڑی سٹار ہوں لیکن فیملی مجھے بڑا سٹار نہیں سمجھتی کیونکہ ان کی نظر میں خواتین کو شوبز میں ہرگز کام نہیں کرنا چاہیے ۔