انڈیا میں ایک سال کے دوران 200 پروازوں میں سوار ہو کر ملک کے ایئرپورٹس پر ڈکیتیاں کرنے والا مجرم آخر پولیس کے شکنجے میں آہی گیا ۔ حیدرآباد سے دہلی جانے والی ایک خاتون نے گزشتہ ماہ شکایت کی کہ ان کے ہینڈ بیگ سے 7 لاکھ روپے کے زیورات دوران پرواز کسی نےچوری کیے ہیں۔
اس کے علاوہ پولیس کو امریکہ سے ایک شخص کی طرف سے ایک اور شکایت موصول ہوئی جس میں بتایا گیا کہ ان کے کیبن بیگ سے بھی پرواز کے دوران 20 لاکھ روپے کا قیمتی سامان چوری ہوا ہے۔ اس پر پولیس ایکشن میں آئی ، پولیس نے دہلی، حیدرآباد اور امرتسر کے ایئرپورٹس سے سی سی ٹی وی فوٹیج سکین کر کے راجیش کپور نامی شخص کو دہلی کے علاقے پہاڑ گنج سے گرفتار کر لیا ہے۔
دہلی پولیس کی ڈپٹی کمشنر اوشا رنگرانی نے کہا کہ اس شخص نے ان مسافروں کو نشانہ بنایا جو کنیکٹنگ فلائٹس لے رہے تھے۔ اپریل میں حیدرآباد سے دہلی جانے والی خاتون کو دہلی کے آئی جی آئی ایئرپورٹ سے امریکہ جانے والی ایئر انڈیا کی پرواز میں سوار ہونا پڑا۔ اسی طرح امریکی شہری ورجندرجیت سنگھ امرتسر سے جرمنی جا رہے تھے اور دہلی سے ان کی کنیکٹنگ فلائٹ تھی ۔ اہلکار نے کہا کہ ملزم نے بوڑھے افراد اور خواتین مسافروں کو اپنے ہدف کے طور پر چنا ، ملزم اپنے اہداف کا پیچھا کرتے ہوئے ’بیگیج ڈیکلریشن سلپ‘ پر دی گئی معلومات کو چالاکی سے پڑھتا پھر بیگ کے اندر موجود قیمتی اشیاء کے بارے میں معلوم کرلیتا تھا کہ کونسا بیگ قیمتی اششیاء سے بھرا ہے ۔
اس کے بعد راجیش ایئر لائن سے اپنی سیٹ تبدیل کرنے کی درخواست کرتا تھا تاکہ وہ اس مسافر کے ساتھ بیٹھ سکے پھر وہ مسافر کے ساتھ بیٹھ کر اوور ہیڈ سیکشن میں سامان رکھنے کے لیے اٹھتا تھا اور مسافر کا قیمتی سامان چرا لیتا تھا۔
راجیش ایک اچھا کاروبار بھی کرتا ہے وہ نئی دہلی ریلوے سٹیشن کے قریب دہلی پہاڑ گنج میں ایک گیسٹ ہاؤس ‘رکی ڈیلکس’ کا مالک ہے۔ پولیس کے مطابق راجیش کا منی ایکسچینج کا کاروبار تھا اور دہلی میں موبائل ریپیئرنگ کی دکان بھی چلاتا تھا۔ تلاشی کے دوران پہاڑ گنج میں اس کے گھر سے سونے اور چاندی کے زیورات کی بڑی مقدار بھی برآمد ہوئی ہے۔ تاہم، اس نے یہ بھی اعتراف کیا کہ کئی مواقع پر اس نے چوری شدہ زیورات قرول باغ میں شرد جین نامی جیولر کو بیچے۔جس کی گرفتاری کے لیے پولیس چھاپے ماررہی ہے –
