تحریک انصاف کے وزیراعظم کے عہدے کے نامزد امیدوار عمر ایوب ابھی تک روپوش تھے تاہم آج وہ پشاور ہائی کورٹ میں پیش ہوئے جہاں انہین عدالت سے ایک بڑا ریلیف مل گیا اور یوں ان کی گرفتاری کا خطرہ کم تو ہوا ہے مگر ختم نہیں ہوا کیونکہ اسلام آباد آنے کی صورت میں انہیں دوبارہ گرفتار کیا جاسکتا ہے -پشاور ہائی کورٹ نے پاکستان تحریک انصاف کے نامزد وزیر اعظم عمر ایوب کی تمام کیسز میں حفاظتی ضمانت منظور کر لی۔
آج پشاور ہائی کورٹ میں عمر ایوب کی حفاظتی و راہداری ضمانت کیلئے دائر درخواستوں پر سماعت ہوئی، عمر ایوب وکیل بابر اعوان کے ہمراہ عدالت میں پیش ہوئے۔وکیل بابر اعوان نے پشاور ہائی کورٹ کے جج سے درخواست کی کہ عمر ایوب کے خلاف کل 23 مقدمات درج ہیں، جن میں 4 کیس لاہور، 13 راولپنڈی، 2 اسلام آباد، 3 اٹک، 1 کیس گوجرانوالہ میں درج ہیں، میرا درخواست گزار وزیراعظم کا امیدوار ہے، 8 ہفتے دیئے جائیں تاکہ تمام مقدمات میں ریلیف لیا جائے۔
چیف جسٹس نے اے اے جی سے استفسار کیا کہ ملزم کو کتنے دن کی مہلت دی جائے تاکہ وہ ضمانت لے، جس پر اے اے جی دانیال چمکنی نے کہا کہ عدالت کو جو مناسب لگے وہی ٹائم دے۔بعدازاں پشاور ہائی کورٹ نے عمر ایوب کو ایک لاکھ روپے کے مچلکے جمع کرانے کا حکم دیتے ہوئے رہنما پی ٹی آئی کو ایک ماہ میں متعلقہ عدالتوں میں پیش ہونے کی ہدایت بھی دے دی۔عدالت کا کہنا تھا کہ عمر ایوب کو ضمانت دے دی ہے وہ اسلام آباد جائیں الیکشن میں حصہ لیں -بے خوف ہوجائیں اب انہیں کسی کیس میں گرفتار نہیں کیا جائے گا۔