سابق وزیراعظم عمران خان کی اہلیہ بشریٰ بی بی کا چیک اپ مکمل کرلیا گیا اور ڈاکٹرز نے تمام رپورٹس کلیئر قرار دے دیں۔اس سے قبل بشریٰ بی بی نے شکایت کی تھی کہ ان کو دو بار کھانے میں ایسی مضر صحت اشیاء دی گئی ہیں جن سے ان کی طبیعت خراب ہوئی جس کا اعتراف جیل مین معائنہ کرنے والے ڈاکٹر نے بھی کیا تھا کہ ان کے معدے میں تکلیف ہے –
نجی ٹی وی جیو نیوز نے ذرائع کے حوالے سے بتایا کہ بشریٰ بی بی ٹیسٹ کیلئے 6 گھنٹے اسلام آباد کے نجی ہسپتال میں رہیں جہاں ان کی انڈوسکوپی سمیت متعدد ٹیسٹ کئے گئے۔ذرائع نے بتایاکہ بشریٰ بی بی نے بلڈ ٹیسٹ کرانے سے انکار کیا اور خون کا نمونہ نہیں دیا۔ہسپتال ذرائع کا کہنا ہے کہ بشریٰ بی بی کی اینڈو اسکوپی،الٹرا ساؤنڈ ، ایکو اور ای سی جی کی گئی ،عدالتیحکم کے عین مطابق چیک اپ کے وقت بانی پی ٹی آئی عمران خان کے ذاتی معالج ڈاکٹرعاصم بھی بشریٰ بی بی کے ساتھ موجود تھے۔ذرائع کے مطابق ڈاکٹرز نے تمام رپورٹس کلیئر قرار دے دیں۔ ہسپتال ذرائع کا کہنا ہے کہ بشریٰ بی بی کو معدے یعنی گیسٹرو کا معمولی مسئلہ ہے جس کا علاج جاری ہے ۔ہسپتال ذرائع نے بتایاکہ بشریٰ بی بی کا خون کا نمونا نہ دینے کا معاملہ حتمی رپورٹ میں تحریر کیا جائے گا اور میڈیکل رپورٹس ڈاکٹرعاصم، جیل سپرنٹنڈنٹ اور پمز ہسپتال کو فراہم کی جائیں گی۔یاد رہے کہ گزشتہ روز احتساب عدالت نے بشریٰ بی بی کی درخواست منظور کرتے ہوئے دو روز میں نجی ہسپتال سے ان کے ٹیسٹ کروانے اور اگلی سماعت میں رپورٹس پیش کرنے کا حکم دیا تھا جس پر آج من وعن عمل درآمد کیا گیا۔