کے پی کے میں جب سے عمران خان کے حمائتی سنی اتحاد کونسل کی حکومت نے اقتدار سنبھالا عوام کی خدمت کا عمل شروع ہوگیا ہے ،علی امین گنڈا پور نے عوام کو مساجد میں مفت بجلی دینے کا بھی اعلان کردیا ہے اس کے علاوہ وزیراعلیٰ نے خیبرپختونخوا میں یکم رمضان سے صحت کارڈ کے تحت تمام شہریوں کے لیے مفت علاج کی سہولت بحال کرنے کا اعلان کردیا ہے۔
وزیر اعلیٰ خیبر پختونخوا علی امین گنڈاپور کے زیرصدارت اجلاس ہوا جس میں اعلیٰ حکام کے علاوہ سٹیٹ لائف انشورنس کے نمائندوں نے بھی شرکت کی، اجلاس میں یکم رمضان سے صحت کارڈ کے تحت صوبے کی 100 فیصد آبادی کے لیے مفت علاج بحال کرنے کا فیصلہ کیا گیا ہے۔وزیر اعلیٰ کی ہدایت پر صحت کارڈ کے تحت مفت علاج بحال کرنے کے لیے سٹیٹ لائف انشورنس کمپنی کو فوری طور پر پانچ ارب روپے جاری کردیے گئے۔دوران اجلاس وزیراعلیٰ خیبرپختونخوا علی امین گنڈا پور نے کہا کہ امن و امان کے بعد عوام کی فلاح و بہبود صوبائی حکومت کی اہم ترجیح ہے، صحت کارڈ عوامی فلاح و بہبود کا اہم منصوبہ ہے، اسے ہر حال میں جاری رکھا جائے گا۔انہوں نے کہا کہ اسٹیٹ لائف کے بقایا جات کی ادائیگی کے لیے ترجیحی بنیادوں پر فنڈز فراہم کیے جائیں گے۔وزیراعلیٰ نے مزید کہا کہ اس اسکیم میں شفافیت کو یقینی بنانے کے لیے ضروری اصلاحات کی جائیں گی تاکہ اس کا زیادہ سے زیادہ فائدہ عوام کو پہنچ سکے۔