عمران خان کی اے ٹی ایم کہلانے والے علیم خان اور جہانگیر ترین اس وقت ان کی جماعت کے لیے بڑے مسائل پیدا کررہے ہیں اور تحریک انصاف کے سابق رہنماؤں کو اپنی پارٹی میں بھررہے ہیں -اگرچہ استحکام پاکستان پارٹی کو عوام کی جانب سے کوئی خاص رسپانس نہیں مل رہا تاہم اس جماعت میں بہت سے بڑے نام ضرور داخل اور شامل ہوگئے ہیں
آج جہانگیر ترین نے عمران خان پر ایک اور الزام لگا دیا -�استحکام پاکستان پارٹی کے سربراہ جہانگیر ترین نے کہا ہے کہ علیم خان بڑا ورکر ہے، جس نے چیئرمین پی ٹی آئی کے لیے بہت کچھ کیا، ان کا کہنا تھا کہ جب عمران خان وزیراعظم تھے تو مجھے پتہ چلا کہ علیم خان کو کرپشن کیس میں گرفتار کرلیا گیا ہے -مجھے یہ سن کر بہت دکھ ہوا کہ عمران خان نے علیم خان کو جیل بھجوایا، چیئرمین پی ٹی آئی جب وزیراعظم کی کرسی پر بیٹھے وہ کوئی اور انسان تھے۔
راولپنڈی میں آئی پی پی کی تقریب سے خطاب میں جہانگیر ترین نے کہا کہ ہم نے محنت کرکے پاکستان کو بنایا، ہم روایتی سیاست کو چھوڑ کر نئے جذبے کے ساتھ آئے ہیں ، ہم ایک ایسا ملک بناناچاہتے ہیں جہاں غربت اور بےروزگاری نہ ہو۔ ان کا مزید کہنا تھا کہ ہم ایسا ملک بنانا چاہتے ہیں جس پر ہم فخر کرسکیں، انھوں نے اپنے پارٹی ورکرز سے کہا کہ ہمیں امید نہیں چھوڑنی چاہیے، محنت کرتے رہنا چاہیے، ہمیں اپنی نیت اور سوچ مثبت اور بلند رکھنی ہے ۔انہوں نے کہا کہ ہمارا سفر لمبا ہے اس کی تکمیل کے لیے اپنی پوری کوشش کریں گے، پروگرام بن گیا ہے، پنڈی میں بڑا جلسہ کریں گے۔