بہت ہی ٹھنڈے لہجے میں بات کرنے والے انسان دوست علامہ ڈاکٹر راغب حسین نعیمی کو اسلامی نظریاتی کونسل کا چئیرمین بنادیا گیا -ہمیشہ مزہبی ہم آہنگی کی بات کرنے والے مفتی کا اس سیٹ پر آنا ملک کے لیے اچھا شگون ہے -صدر پاکستان آصف علی زرداری نے علامہ ڈاکٹرمحمدراغب حسین نعیمی کو اسلامی نظریاتی کونسل کاچیئرمین مقررکردیا۔ وزارت قانون وانصاف نے ڈاکٹرراغب حسین نعیمی کی تقرری کانوٹیفکیشن جاری کردیا ہے۔ڈاکٹرراغب حسین نعیمی اس وقت کئی پوزیشن پرخدمات سرانجام دے رہے ہیں۔ وہ لاہور میں معروف دینی درسگاہ جامعہ نعیمیہ کے ناظم اعلیٰ اورمتحدہ علماء بورڈ پنجاب کے چیئرمین ہیں،پنجاب زکوٰۃ کونسل کے ممبر بھی رہے ہیں۔اس کے ساتھ ساتھ قرآن بورڈ پنجا ب اورمرکزی رویت ہلال کمیٹی کے رکن بھی ہیں۔پنجاب یونیورسٹی لاہور اورزرعی یورنیورسٹی فیصل آباد کے سنڈیکٹ کے ممبر ہیں۔
علامہ ڈاکٹرمحمدراغب حسین نعیمی نے دینی تعلیم دارالعلوم جامعہ نعیمیہ لاہورسے حاصل کی ہے۔ گورنمنٹ کالج سے گریجوایشن کرنے کے بعد ، پنجاب یونیورسٹی سے ایم اے عربی میں گولڈ میڈلسٹ اور اسلامی معاشیات میں پی ایچ ڈی ہیں۔ملک وبیرون ملک بیسیوں کانفرنسز میں مقالات پیش کرچکے ہیں۔تعلیم کے فروغ،امن وامان کے قیام اوربین المذاہب ومسالک کے فروغ کیلئےان کی خدمات کو قدر کی نگاہ سے دیکھا جاتاہے حال ہی میں ان کو دینی،تعلیمی اورسماجی خدمات کے اعتراف میں صدرمملکت کی جانب سے ”ستارۂ امتیاز“سے نوازا گیا ہے۔ان کی تقرری علامہ طارق اشرفی کی جگہ کی گئی ہے –