کراچی میں عائشہ منزل کے قریب آگ سے متاثرہ رہائشی عمارت سے ایک اور لاش نکال لی گئی، واقعے میں جاں بحق افراد کی تعداد 5 ہو گئی۔ ریسکیو ذرائع کا کہنا تھا کہ آگ اور دھوئیں کے سبب متوفی کی ہلاکت دم گھٹنے اور جھلسنے سے ہوئی، لاش شاپنگ مال کی پہلی منزل سے ملی ہے جس کو ہسپتال منتقل کر دیا گیا ہے۔
دوسری جانب سندھ بلڈنگ کنٹرول اتھارٹی نے آگ کی شدت کے سبب عمارت کو مخدوش قرار دے کر متاثرہ عمارت کو سیل کر دیا ہے۔عمارت میں داخلے سے روکنے کے لیے پولیس کی نفری بھی تعینات کر دی گئی ہے۔اس حوالے سے ایس بی سی اے کا کہنا ہے کہ عرشی سینٹر کی عمارت کو سیل کر دیا گیا ہے، معائنے کے بعد فیصلہ ہو گا کہ عمارت استعمال کے قابل ہے یا نہیں۔
ترجمان ایس بی سی اے نے بتایا کہ ڈپٹی کمشنر سینٹرل کی ہدایت پر شاپنگ سینٹر کی عمارت کو سیل کیا گیا ہے، سیل کرنے کا مقصد ہے یہ کہ کوئی شخص اندر داخل نہ ہو سکے اور اپنی جان خطرے میں نہ ڈالے ۔ترجمان کا کہنا ہے کہ کولنگ کے عمل کے بعد ایس بی سی اے کی کمیٹی عمارت کا معائنہ کرے گی، کمیٹی عمارت کے معائنے کے بعد رپورٹ پیش کرے گی۔
عرشی شاپنگ سنٹر میں 250 سے زائد دکانیں اور تقریباً 450 رہائشی فلیٹ ہیں۔ریسکیو 1122 نے آگ کو تیسرے درجے کی قرار دیا ہے-شاپنگ سنٹر میں بحرک جانے والی آگ نے اپنے ساتھ کئی دوسری ملحقہ عمارات کو بھی اپنی لپیٹ میں لے لیا تھا -جس کی وجہ سے جانی اور مالی نقصان زیادہ ہوا –