عدالتی حکم کے باوجودسمیع ابراہیم کا نام ای سی ایل سے نہ نکالنے پر جج برہم

اسلام آباد (انٹرنیوز) اسلام آباد ہائیکورٹ نے صحافی سمیع ابراہیم کا نام ای سی ایل سے نکالنے کی درخواست نمٹادی۔تفصیلات کے مطابق اسلام آباد ہائیکورٹ میں جسٹس سردار اعجاز اسحاق نے صحافی سمیع ابراہیم کا نام ای سی ایل سے نکالنے کی درخواست پر سماعت کی۔عدالتی احکامات کے باوجود سمیع ابراہیم کا نام ای سی ایل سے نکالنے پر عدالت نے برہمی کا اظہار کرتے ہوئے سیکرٹری داخلہ سے ایک گھنٹے میں رپورٹ طلب کرتے ہوئے کہا ہے کہ وجوہات بتائی جائیں سمیع ابراہیم کا نام ای سی ایل سے کیوں نہیں نکالا ؟۔ انہوں نے کہا کہ اگر سیکرٹری داخلہ نے تسلی بخش جواب نہ دیا تو ایس ایچ او کو گرفتاری کا حکم دے دیں گے جس کے بعد سماعت میں ایک گھنٹے کا وقفہ کردیا گیا ۔دوبارہ سماعت شروع ہوئی تو عدالتی حکم کے باوجود 11بجے تک سیکرٹری داخلہ عدالت کے سامنے پیش نہیں ہوئے جس پر عدالت نے کہا کہ 50ہزار روپے کے مچلکے جمع کرانے کے عوض قابل ضمانت وارنٹ گرفتاری کررہے ہیں، سیکرٹری داخلہ کو 2.30 بجے تک پیش کیا جائے۔ ۔دوران سماعت سرکاری وکیل نے عدالت کو بتایا کہ ڈی جی پاسپورٹس رستے میں ہیں کچھ دیر بعد پہنچ جائیں گے جس پر جسٹس سردار اعجاز اسحاق نے استفسار کیا کہ وہ آکر کیا کہیں گے، انہیں وزارت داخلہ نے کہا تھا۔سماعت دوبارہ شروع ہوئی تو ڈی جی پاسپورٹس عدالت کے سامنے پیش ہوئے اوربتایا کہ عدالتی حکم پر عمل کرتے ہوئے سمیع ابراہیم کا نام پی این آئی ایل لسٹ سے نام نکال دیا تھا، اس کے بعد اسلام آباد پولیس کی درخواست پر نام دوبارہ ای سی ایل پر ڈالا گیا ہے۔عدالت نے ریمارکس دیے کہ پہلی درخواست نمٹا رہے ہیں اب پھر پٹشنر نئی پٹیشن فائل کر سکتے ہیں،عدالت نے ڈی جی پاسپورٹس کے بیان کے بعد درخواست نمٹا دی۔
٭٭٭٭٭