اسلام آباد: صدر مملکت ڈاکٹر عارف علوی نے ملک میں صنعتی ترقی کے لیے انکم ٹیکس (ترمیمی) آرڈیننس 2022 جاری کردیا۔
صدر کے میڈیا ونگ کی جانب سے جاری کردہ پریس ریلیز کے مطابق اس قانون کا مقصد سرمایہ کاری کو راغب کرنا، صنعتی شعبے کو فروغ دینا اور ملک کے بیمار صنعتی یونٹس کو بحال کرنا ہے۔
یہ بیمار صنعتوں کی بحالی کے لیے ایک مراعاتی پیکج بھی پیش کرتا ہے۔
یکم مارچ کو صدر علوی نے آئل اینڈ گیس ریگولیٹری اتھارٹی (اوگرا) اور کونسل آف الائیڈ ہیلتھ سائنسز پاکستان سے متعلق بلوں پر دستخط کیے تھے۔
بلوں میں اوگرا (ترمیمی) ایکٹ 2022، اوگرا (دوسری ترمیم) ایکٹ 2022، اور الائیڈ ہیلتھ پروفیشنلز کونسل ایکٹ 2022 شامل ہیں۔
صدر کے میڈیا آفس کے مطابق ڈاکٹر عارف علوی نے آئین کے آرٹیکل 75 کے مطابق تین بلوں کی منظوری دی تھی جس کے تحت انہیں ایکٹ بنایا گیا تھا۔
2 دسمبر 2021 کو صدر علوی نے پروٹیکشن آف جرنلسٹس اینڈ میڈیا پروفیشنلز بل پر دستخط کرتے ہوئے اسے ملک کے لیے تاریخی قانون سازی قرار دیا۔
صدر نے اسلام آباد میں ایک تقریب کے دوران اس قانون پر دستخط کیے تھے جس میں کابینہ کے وزراء، صحافیوں اور میڈیا کے دیگر پیشہ ور افراد نے شرکت کی۔
اس بل میں صحافیوں کی زندگیوں کے تحفظ، انہیں ہراساں اور تشدد سے بچانے اور زندگی اور صحت کی انشورنس کی سہولیات دے کر ان کی فلاح و بہبود کو یقینی بنانے پر توجہ مرکوز کی گئی تھی۔
