وزیر برائے موسمیاتی تبدیلی شیری رحمان نے عالمی ماحولیاتی ایجنڈے کی تنظیم نو اور ماحولیاتی انحطاط سے نمٹنے کے لیے عالمی برادری کی جانب سے کیے گئے ماحولیاتی وعدوں پر عمل درآمد کے لیے مساوی وسائل پر زور دیا ہے۔
پیٹرزبرگ منسٹریل کلائمیٹ ڈائیلاگ 2022 میں پاکستان کی نمائندگی کے لیے جرمنی میں موجود وزیر نے الجزیرہ کو انٹرویو دیتے ہوئے یہ تجاویز دیں۔
شیری رحمان نے کہا کہ پاکستان موسمیاتی تبدیلی کے اثرات سے ہونے والے نقصانات کے حوالے سے ترقی پذیر ممالک کے موقف کی حمایت کرتا ہے۔
انہوں نے کہا کہ پاکستان نے اقوام متحدہ کے ماحولیاتی تبدیلی کے فریم ورک کنونشن کے تحت ترقی یافتہ ممالک کی طرف سے موسمیاتی مالیات کی ناکافی فراہمی پر گہری تشویش کا اظہار کیا ہے۔
وزیر نے عالمی برادری پر زور دیا کہ وہ موسمیاتی تبدیلی کے خطرات سے نمٹنے کے لیے اضافی اور پائیدار وسائل فراہم کرے۔
انہوں نے کہا کہ دنیا کو ماحولیاتی تبدیلی کے مشترکہ اہداف کے حصول کے لیے وعدوں سے آگے بڑھنا چاہیے۔