مسلم لیگ نون کے سینئر نائب صدر جو مریم کو سینئر نائب صدر بنانے پر مسلم لیگ نون سے خفا تھے اب حکومت کے سپریم کورٹ کے چیف جسٹس کے خلاف ریفرنس لانے پر بھی پارٹی سے متفق نہیں جس کا اظہار انھوں نے میڈیا پر بھی کردیا-جب ان سے رائے لی گئی کہ عدالت عظمیٰ کے ججز کیخلاف ریفرنس ہونا چاہیے یا نہیں ؟ تو سابق وزیر اعظم شاہد خاقان عباسی نے ایک بار پھر اختلاف کر دیا ۔سابق وزیر اعظم شاہد خاقان عباسی نے کہا ہے کہ وہ نواز شریف کی رائے کا احترام کرتے ہیں لیکن ان کی رائے میں ججوں کیخلاف ریفرنس دائر نہیں ہونا چاہیے۔
شاہد خاقان عباسی نے کہا ہے کہ چیف جسٹس نے فل بینچ بنانے کی بات نہ سن کر ادارے کی ساکھ کو نقصان پہنچایا مگر سپریم کورٹ کے ججز کے خلاف ریفرنس دائر کرنے سے عدلیہ میں تقیسم پیدا ہوگی۔ چیف جسٹس پر لازم تھا کہ اپنے ادارے کی ساکھ بچاتے، انہوں نے ادارے کی ساکھ نہیں بچائی اور فیصلہ متنازع ہو گیا، ججز کیخلاف ریفرنس مس کنڈکٹ پر دائر ہوتا ہے، اور اس وقت چیف جسٹس قانون کے مطابق چل رہے ہیں اس لیے میں ریفرنس دائر کرنے کے حق میں نہیں۔