اسلام آباد: پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے ملک کی سیاسی صورتحال پر تبادلہ خیال کے لیے دو روزہ اجلاس طلب کیا۔
تفصیلات کے مطابق پی ڈی ایم کے سربراہ نے دو روزہ اجلاس بلایا ہے جو کل اسلام آباد میں شروع ہوگا۔
باخبر ذرائع نے بتایا کہ اجلاس میں حکمران اتحاد کی جماعتیں شرکت کریں گی اور سیاسی و اقتصادی صورتحال پر بات چیت کی جائے گی۔
اجلاس میں قبل از وقت انتخابات، آرٹیکل 62 کی تشریح کے حوالے سے صدارتی ریفرنس اور سپریم کورٹ کے اختیارات کے حوالے سے بات چیت کی جائے گی۔
دو روزہ مشاورتی اجلاس کے بعد پی ڈی ایم اور حکمران اتحاد کی جانب سے اہم فیصلوں کا اعلان متوقع ہے۔
ذرائع کا کہنا ہے کہ مسلم لیگ ن کے قائد نواز شریف ویڈیو لنک کے ذریعے اجلاس میں شرکت کریں گے۔
اس سے قبل پی ڈی ایم کے ترجمان حافظ حمد اللہ نے غیر ملکی فنڈنگ کیس کے حوالے سے ایک بیان میں کہا تھا کہ غیر ملکی فنڈنگ سے متعلق فیصلہ سنانے میں بلاجواز تاخیر سمجھ سے بالاتر ہے۔
انہوں نے سوال کیا کہ اگر عمران نیازی ایماندار اور قابل اعتماد ہیں تو غیر ملکی فنڈنگ کیس کا فیصلہ کیوں زیر التوا ہے، امید ہے الیکشن کمیشن نیازی گینگ کی دھونس اور دھمکیوں سے نہیں ڈرے گا۔
